Azərbaycan, Bakı, 5 may /Trend, müxbir N.İsmayılova/
2009-cu il ərzində Mogilev liftqayırma zavodu Azərbaycana 37 lift tədarük edib. Bunu çərşənbə axşamı Bakıda keçirilən Belarus Respublikasının ikinci milli sərgisində zavodun təmsilçisi deyib.
"Hazırda liftlərin gətirilməsi davam edir. Cari ilin birinci rübündə üç lift gətirilib", - o deyib.
Onun sözlərinə görə, Mogilevliftmaş Azərbaycana tədarükün həcminin artmasına və 2009-cu ildəki göstəricini üstələyəcəyinə ümid edir.
Keçən ilin əvvəlində zavod 221 611 lift istehsal edib. UDM (Unitar Dövlət Müəssisəsi) olan "Mogilevliftmaş" zavodunun istehsal proqramı hazırda 70-dən çox əsas lift modelindən ibarətdir: 400-dən 1000 kq-a qədər yükqaldırma qabiliyyətinə malik sərnişin liftləri; 100 kq-dan 6300 kq-a qədər yükqaldırma qabiliyyətinə malik yük liftləri; 500 kq və 630 kq yükqaldırma qabiliyyətinə malik xəstəxana liftləri; 225 kq yükqaldırma qabiliyyətinə malik kottec liftləri.