Аzərbaycan, Bakı, 25 may /Trend, müxbir Ü.İsmayılova/
Azərbaycanda Mərkəzi Aran zonasında baş vermiş təbii fəlakət nəticəsində tikinti materiallarının qiymətində "psixoloji" artım müşahidə olunur. Bu barədə çərşənbə axşamı ekspert, Rieltorlar Assosiasiyasının həmtəsisçisi, "MBA Group" şirkətinin baş direktoru Nüsrət İbrahimov bildirib.
"Aprel ayında Azərbaycanda tikinti materiallarının qiyməti orta hesabla 1,7 faiz artıb ki, bu da əslində tikinti üçün mövsüm mərhələsinin başlaması ilə əlaqədardır", - İbrahimov bildirib.
Son həftələr ərzində Kürün məcradan çıxması və digər çaylarda daşqınlar səbəbindən, 40 rayonun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətdədir və 50 min hektar əkin və örüş sahələrini su basıb.
Onun sözlərinə görə, qiymət artımı əsasən idxal olunan mallara öz təsirini göstərib, belə ki, ilkin dəmir, taxta, şüşə kimi tikinti materialları ölkədə istehsal olunmur, idxal olunan tikinti materiallarının maya dəyərinin 40 faizi enerjidaşıyıcılarına qoyulan qiymətlər hesabına müəyyənləşir.
Ölkənin tikinti materiallarının idxalından imtinası və tikinti materialları bazarının yalnız daxili istehsalat hesabına yaradılmasından danışan İbrahimov bunun qeyri-mümkün olduğunu vurğulayıb. Belə ki, Azərbaycanda heç də tikinti üçün lazım olan bütün materiallar istehsal olunmur.
"Bütün bunlara baxmayaraq, son bir neçə il ərzində ölkədə idxal olunan tikinti materiallarının həcmi 78 faizdən 57 faizə qədər enib", - İbrahimov qeyd edib.