Azərbaycan, Bakı, 22 iyun /Trend, müxbir N.İsmayılova/
"Azərsun Holdinq"in və Azərbaycan İnvestisiya Şirkətinin (AİŞ) təsis etdikləri "Azərbaycan Duzu İstehsalat Birliyi" Qapalı Səhmdar Cəmiyyəti yayın sonunadək tam istismara veriləcək, - çərşənbə axşamı AİŞ-in icraçı-direktoru Əfqan İsayev deyib.
"Zavod artıq fəaliyyətinə başlayıb. Lakin hələ ki sınaq rejimində işləyir", - İsayev bildirib.
"Azersun Holding"in ictimaiyyətlə əlaqələr və sosial layihələr üzrə şöbəsinin rəhbəri Afiq Səfərovun dediyinə görə, hazırda duzun "Azərduz" markası altında ölkə ərazisindəki bütün ticarət obyektlərində yayılmasının aktiv təbliğatı aparılır. Onun sözlərinə görə, yaxın vaxtlarda daxili bazarın tələbatı ödənildikdən (bir neçə həftə ərzində) sonra, zavod ilkin mərhələdə məhsulunu MDB ölkələrinə, gələcəkdə isə dünyanın digər ölkələrinə ixrac edəcək.
Səfərovun sözlərinə görə, hazırda zavodun sutkalıq gücü 100 ton təşkil edir. Lakin yaxın vaxtlarda bu göstərici 300 tonadək yüksəldiləcək.
Bu günədək zavodun tikintisinə 16 mln manat qoyulub. Gələcəkdə daha 4 mln manat sərmayə yatırılacaq. Yatırılan sərmayənin 25 faizi Azərbaycan İnvestisiya Şirkətinin, qalan hissə isə "Azərsun Holdinq"in payına düşür.
