Azərbaycan, Bakı, 25 iyun /Trend, müxbir T.Cəfərov/
Azərbaycanla İran arasında mal dövriyyəsini 10 milyard dollara çatdırmaq üçün ölkələr arasında bankların qarşılıqlı əlaqələrinin inkişafı böyük önəm kəsb edir. Bu barədə İranın Bakıda səfərdə olan iqtisadiyyat və maliyyə nazirinin müavini Əsgər Əbülhəsəni Hastiani bildirib. Hazırda ölkələr arsında mal dövriyyəsi təxminən 500 milyon dollardır.
"Yeni bankın təsis olunması və bank sistemində əlaqələrin inkişafı öz-özlüyündə iqtisadi fəaliyyətdir, - nazir müavini deyib. - Bank sistemində əlaqələrin inkişafı iki ölkə arasında mal dövriyyəsinin artırılması tapşırığını asanlaşdırar".
Nazir müavininin sözlərinə görə, Azərbaycanla İran arasında əvvəllər də bank sahəsində əlaqələr olub.
"Biz bank, eləcə də sığorta sahəsindəki əlaqələrin daha da inkişafında maraqlıyıq, - Hastiani bildirib. - Hazırkı iqtisadi fəaliyyətlə sığorta fəaliyyəti olmadan heç bir uğura nail olmaq mümkün deyil".
Ümumilikdə, nazir müavini hesab edir ki, İran region ölkələri arasında Azərbaycanla əlaqələrin inkişafına xüsusi diqqət ayırır.
Azərbaycanda 20 ilə yaxın Bank Melli Iranın Bakı filialı fəaliyyət göstərir və bank öz fəaliyyətini genişləndirmək niyyətindədir. Azərbaycanla İran arasında bank sahəsində əlaqələr yalnız bir bankla məhdudlaşmır.
"İran özəl bankların Azərbaycanda öz fəaliyyətlərini inkişaf etdirməsində maraqlıdır", - nazir müavini qeyd edib.
Azərbaycanda bank sahəsində iki ölkə arasında əlaqələrin inkişafı prosesi çərçivəsində Azərbaycan tərəfinin tələbinə uyğun olaraq İranın özəl bankları fəaliyyətə başlayıblar. Onun sözlərinə görə, hazırda bu istiqamətdə danışıqlar aparılır.
"Biz bu istiqamətdə bütün zəruri tədbirləri həyata keçirməyə hazırıq", - Hastiani deyib.