Azərbaycan, Bakı, 29 iyun /Trend, müxbirlər Ü.İsmayılova, N.İsmayılova/
Azərbaycan Mərkəzi Bankı (AMB) sosial ipotekanın 2011-ci ildə dövlət tərəfindən maliyyələşdirilməsini davam etdirməyi və onun həcminin artırılmasını təklif edir, - çərşənbə axşamı AMB İdarə Heyətinin sədri Aftandil Babayev deyib.
"Cari ilin dövlət büdcəsində sosial ipoteka üzrə nəzərdə tutulan 14 milyon manat məbləğində vəsait tam mənimsənilməyib. Ötən ilin iyunundan biz ipotekanı bazardan alınan vəsaitlər hesabına bərpa etdik və genişləndirdik. Bununla yanaşı, biz gələn il siyasi böhran vəziyyətində maliyyələşmənin dövlət dəstəyinin davam etdirilməsi və onun həcminin artırılması barədə niyyətimizi bildirmişik", - Babayev bildirib.
Onun fikrincə, bu, ipoteka mexanizminin gələcəkdə təkmilləşdirilməsi üçün lazımdır, belə ki, o, tam olmalı və əhalinin bütün təbəqələrini əhatə etməlidir.
2009-cu ildə Azərbaycan İpoteka Fondunun (AİF) xətti ilə 1800 ölkə vətəndaşına 76 milyon manat məbləğində kredit verilib. Ötən ilin ikinci rübündə verilən kreditlərin məbləği 2006-2007-ci illərdəki (75,8 mln manat) ipotekanın maliyyələşdirilməsinin məbləğini ötüb. Təkcə ötən ilin dekabrında AİF tərəfindən doqquz milyon manat məbləğində kredit verilib.
Fond tərəfindən 2006-cı ildə, ümumilikdə, 152 mln manat məbləğində ipoteka krediti verilib ki, bu da 3800 ipoteka kreditini maliyyələşdirməyə imkan verib.
İpoteka fondu büdcə maliyyələşdirilməsindən başqa, (2009-cu il dövlət büdcəsində 14 mln manat nəzərdə tutulub) 55 mln (tam yerləşdirilib) və 75 mln manat məbləğində (38 mln manat yerləşdirilib) iki ipoteka istiqrazı emissiyalarını qeydə alıb.
AİF-in şərtlərinə görə, Azərbaycanda adi ipotekanın verilməsinin maksimum həddi 50 min manat təşkil edir və səkkiz faiz dərəcə ilə 25 il müddətinə verilir. Sosial ipoteka 35 min manat təşkil edir və dörd faiz dərəcə ilə 30 il müddətinə verilir. Adi və güzəştli kreditlər üçün ilkin ödəniş 15 faizdir.
AİF 2005-ci ilin dekabr ayında yaradılıb. 2006-cı ilin martından ipoteka kreditlərinin verilməsinə başlayıb. 2007-ci ilin iyununda fond maliyyə çatışmazlığı ilə əlaqədar olaraq kreditin verilməsini dayandırıb. 2009-cu il iyunun 1-dən kreditin verilməsi bərpa edilib.
İyunun 29-na olan rəsmi məzənnə 0,8039 AZN/USD təşkil edir.
