Azərbaycan, Bakı, 7 iyul /Trend, müxbir N.İsmayılova/
Azərbaycanda yeganə qızıl istehsalçısı olan "Anglo Asian Mining plc" şirkəti dörd ay ərzində 145 tona yaxın quru mis konsentratı istehsal edib. Bu barədə şirkətin məlumatında deyilir.
Dörd ay ərzində, 30 iyun 2010-cu il tarixinədək şirkət tərkibi 60 faizlik misdən ibarət 145 tona yaxın quru mis konsentratı və hər konsentrat tonuna 4 kq gümüş istehsal edib.
"Mis konsentratı qeyri-adi yüksək rütubətliliyə malikdir və bunun da nəticəsində yeni filtrasiya sistemi sifariş edilib", - məlumatda qeyd olunub.
Şirkət konsentratlardan alınan mis və gümüşün realizəsi variantlarının qiymətləndirilməsi prosesini keçirir.
Fevralda misin bərpası və emalı prosesinə start verilib. İstehsal prosesi optimallaşdırıldıqdan sonra zavodun avtomatlaşdırılması sistemi qurulacaq. Zavodun gücü ildə 1800 ton mis təşkil edir. Lakin istehsal həcmi filizlərin mineralogiyasından və proseslərin effektivliyindən asılı olacaq.
"Anglo Asian Mining plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir.
Azərbaycan hökuməti ilə Azərbaycan Beynəlxalq Mədən Əməliyyatı Şirkəti arasında 30 il müddətinə imzalanan hasilatın pay bölgüsü haqqında müqavilədə Azərbaycanın pay hissəsi 51 faiz, Böyük Britaniyanın "Anglo-Asian Mining plc" şirkətinin pay hissəsi isə 49 faizdir.