Türkmənistan, Aşqabad, 12 iyul /Trend, müxbir H.Həsənov/
Türkmənistanda 2010-cu ilin birinci rübündə mal və xidmətlərin ixracı sayəsində valyuta vəsaitləri 131,9 faiz təşkil edib. Bu barədə ölkənin Mərkəzi Bankı məlumat verib.
2009-cu ilin müvafiq dövrü ilə müqayisədə bu göstərici təbii qaz, neft və neft məhsulları, sıxılmış qaz, elektrik enerjisi, kimya və tekstil məhsullarının ixracı hesabına artıb.
Bundan başqa, ölkədə pul-kredit dövriyyəsinin artımı müşahidə olunur. İqtisadiyyatın istehsal sahəsinə yönəldilən kreditlərin həcmi planlı şəkildə artıb.
Bank sistemi kənd təsərrüfatı, sənaye, tikinti və böyük layihələrin inkişafı ilə bağlı digər sahələrin maliyyələşdirilməsi üzrə dövlət proqramında fəal iştirak edir.
Şəhər və kəndlərdə yaşayış evlərinin alınması və tikintisinə, özəl sahibkarlığın inkişafına buraxılan kreditlərdə də artım qeyd olunur.
Türkmənistan hazırda milli valyutanın dözümlülüyünü təmin etmək üçün denominasiyanın ikinci mərhələsini keçirir.
"2010-cu ilin yanvarından iyun ayınadək manatın xarici valyutaya nisbəti sabit qalıb", - Mərkəzi Bankın məlumatında vurğulanıb.
Nağdsız ödənişlər üzrə xidmət növlərinin artırılması, bank infrastrukturunun genişləndirilməsi, bu sahəni tənzimləyən qanunvericiliyin təkmilləşdirilməsi üçün işlər də görülür. Bundan başqa, mühasibat və maliyyə uçotu sistemində beynəlxalq standartların tətbiq edilməsi üzrə də işlər aparılır.
Məqsədli kapital yatırımlarının mənimsənilməsi üzrə illik plan 62,8 faiz səviyyəsində yerinə yetirilib. 2009-cu ilin müvafiq dövrünə uyğun olaraq bu göstərici 1,3 dəfə artıb.
