Azərbaycan, Bakı, 20 iyul /Trend, müxbir İ.Xəlilova/
Avropa Yenidənqurma və İnkişaf Bankının (AYİB) Direktorlar Şurası sentyabrın 15-də 2011-2013-cü illəri əhatə edəcək yeni strategiyanı müzakirəyə çıxarmağı planlaşdırır. Bu barədə çərşənbə axşamı AYİB-in Bakı nümayəndəliyindən bildiriblər.
"Sentyabrın sonunadək strategiya şərhlər almaq üçün elan ediləcək, onun təsdiqlənməsi isə 2010-cu ilin sonunda gözlənilir", - nümayəndəlikdən bildiriblər.
Yeni strategiya çərçivəsində əməkdaşlığın istiqamətlərini müzakirə etmək məqsədilə cari ildə AYİB-in Direktorlar Şurasının üzvlərinin səfəri baş tutub.
Hazırda AYİB Azərbaycanın bank sektorunun inkişafında aparıcı rolunu qoruyub saxlayır. Bank növbəti illər üçün maliyyələşmənin daha prioritet istiqamətləri kimi neft sektoru və aqrobiznesi hesab edir, eləcə də əsas nəqliyyat, enerji, infrastruktur layihələrin maliyyələşməsində iştirakını artırır. AYİB özəl sektora kömək istiqamətində və özəl sahibkarlığın gələcək inkişafı, kiçik birgə müəssisələrin maliyyələşməsi üzrə birbaşa və ya köklü şəkildə iş aparır.
2009-cu ildə AYİB Azərbaycanda doqquz layihəyə orta hesabla 232 milyon dollar sərmayə yatırıb. AYİB 2010-cu ildə Azərbaycanda 10 layihəni imzalamağı planlaşdırıb. Cari ilin ilk rübündə bank "Elcell" brendi ilə fəaliyyət göstərən Azərbaycanın aparıcı simsiz internet provayderi DataCELL şirkətinin səhmlər kapitalının maliyyələşməsinə dörd milyon dolların ayrılması barədə müqavilə imzalayıb.
AYİB kənd təsərrüfatına, pərakəndə satışa, eləcə də maliyyə sektoruna qoyulacaq bəzi sərmayələri nəzərdən keçirir. Bank Azərbaycanda infrastrukturun maliyyələşdirilməsinə də səy göstərir. O, sektorlu islahatlara, infrastruktur layihələrin maliyyələşməsinə, korporativ və bank sektorlarına köməyə istiqamətlənib.
Bank islahatlar sahəsində həm dövlət, həm də özəl sektorlarla işləyəcək, eləcə də hökumətlə sərmayə mühitinin yaxşılaşdırılması üzrə siyasi dialoqu davam etdirəcək. O, əsas infrastruktur layihələri, xüsusilə də enerji sektorundakı layihələrin inkişafını maliyyələşdirməkdə davam edəcək.
Bank korporativ sektora kömək məqsədilə yerli sahibkarlarla, bank və xarici sərmayədarlarla iqtisadiyyatın diversifikasiyalaşdırılması, beynəlxalq səviyyədə standartların yaxşılaşdırılması da daxil olmaqla işləyəcək.
Bank sektorunun inkişafı özündə gələcəkdə rəqabətin möhkəmləndirilməsini, kənd yerlərində maliyyə xidmətlərinə daxilolmanın stimullaşdırılması və qeyri-bank maliyyə xidmətlərinin inkişafı üzrə bəzi tədbirləri birləşdirir.
Cari ildə bank 2009-cu ilə nisbətən daha çox sərmayə yatırmağı planlaşdırıb. Bank Azərbaycan iqtisadiyyatının bank və real sektorlarına - kiçik və orta sahibkarlığa, elektrik enerjisi sektorlarına sərmayələri iki dəfə artırmaq niyyətindədir. Bank bunları 5 ildən 15 ilədək uzunmüddətli maliyyələşmə hesabına etmək fikrindədir.
AYİB ümumilikdə Azərbaycanda 114 layihənin həyata keçirilməsinə 1,05 milyard avro yatırıb və bununla bağlı 5,6 milyard avro məbləğində maliyyələşmənin cəlb edilməsi təşkil edilib. AYİB-in hazırkı portfeli 663 milyon avro təşkil edir. Onlardan 69 faiz artıq xərclənib. Bununla yanaşı, xərclənən kreditlərdən banka 283,4 milyon avro qaytarılıb.
