Azərbaycan, Bakı, 9 avqust /Trend, müxbir İ.Xəlilova/
Ümumdünya Ticarət Təşkilatına (ÜTT) üzv ölkələrlə çoxtərəfli növbəti danışıqların - VIII raundunun keçirilməsi ilkin olaraq oktyabr-noyabr aylarına planlaşdırılıb. Bu barədə bazar ertəsi danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib. Bundan əvvəl danışıqların keçirilməsi iyula planlaşdırılıb.
"Biz iyulda işçi qrupunun görüşünün və kənd təsərrüfatı üzrə danışıqların keçirilməsinə hazırlaşmağı çatdırmamışıq, belə ki, mallar üzrə təkliflərin hazırlanması işi davam edir. Danışıqların cari ildə keçirilməsi, bizim ÜTT üzv ölkələrinə təlkifi nə vaxt təqdim edəcəyimizdən asılıdır", - Məmmədquliyev qeyd edib.
İyulda ikitərəfli danışıqlar yalnız xidmətlər sahəsi üzrə olub. İkitərəfli danışıqlar Avropa İttifaqı, Çinin Tayvan əyaləti, Hindistan və digər ölkələrlə keçirilib. Nazir müavininin sözlərinə görə, danışıqlar zamanı kompüter proqramı təminatı üzrə razılaşma əldə olunub.
"Azərbaycanın ÜTT-yə daxil olmasının dəstəklənməsi məsələsi üzrə müzakirələr Çinlə də keçirilib, lakin Çinlə ikitərəfli rəsmi danışıqlar planlaşdırılmayıb; belə ki, onlar belə marağı hələlik bildirməyiblər", - Məmmədquliyev vurğulayıb.
ÜTT işçi qrupu ilə iyul [2009-cu il] görüşündən sonra [çoxtərəfli danışıqların VII mərhələsi] ABŞ və Aİ ilə yanaşı, Avstraliyadan Azərbaycanın tətbiq etməyə hazırlaşdığı daxili dəstək və ixrac subsidiyalarının qrafiki, Braziliyadan tariflərlə bağlı, Cənubi Koreyadan həm tariflər, həm də xidmətlər sahəsi ilə bağlı suallar və şərhlər alınıb. Aİ və ABŞ-la ikitərəfli danışıqlar prosesində tarif öhdəlikləri də əsasdır. Tarif siyasəti ilə yanaşı, onların tələbləri əqli mülkiyyət məsələləri üzrə xidmətlər sahəsinin liberallaşdırılmasına da aiddir. Onlar maliyyə, kommunikasiya sektorlarında, distribüter servisi, paylayıcı sahələrdə bazarların açılmasını təklif edirlər.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir. 2009-cu ildə bu siyahıya İsveçrə də qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə, hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalanmaya razılıq verib.
Bu yaxınlarda ÜTT Katibliyi Azərbaycan üzrə işçi qrupunun tərkibini genişləndirib və ora daha 4 ölkə - Ukrayna, Braziliya, Ekvador və İsveçrəni əlavə edib. Nəticədə, işçi qrupun üzvlərinin sayı, Aİ-nin 27 ölkəsi də daxil olmaqla, 32-yə çatıb.
ÜTT Katibliyi yanında Azərbaycan üzrə işçi qrup 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
