Azərbaycan, Bakı, 18 avqust /Trend, müxbir N.İsmayılova/
"Rosselxozbank" ASC Azərbaycanın bank bazarına daxil olmaqda maraqlıdır. Bu barədə nümayəndəliyin rəhbəri Bəxtiyar Ağayev çərşənbə günü mətbuat konfransında bildirib. ASC 2010-cu il martın 16-da nümayəndəliyi "bir pəncərə" sistemi vasitəsilə Azərbaycanın Vergilər Nazirliyndə qeydiyyatdan keçib; nümayəndəliyin аçılması barədə Azərbaycan Mərkəzi Bankından rəsmi icazə isə iyunun 21-də alınıb.
"Hazırda biz kredit təşkilatları və bankın potensial müştəriləri ilə əlaqələrin qurulması üçün ölkənin bank bazarını fəal şəkildə öyrənirik", - Ağayev deyib.
Onun sözlərinə görə, nümayəndəliyin əsas vəzifəsi Rusiya və Azərbaycan şirkətləri arasında işgüzar əlaqələrin qurulması və inkişafına kömək etmək, ölkələr arasında "Rosselxozbank"ın da iştirakçısı olduğu sazişlərin reallaşdırılmasına yardım, seminarlar, konfranslar, "dəyirmi masa"lar, brifinqlərin keçirilməsi yolu ilə bankla əməkdaşlıq məsələlərinə dair ölkənin işgüzar dairələrini məlumatlandırmaq, bankın iştirakı ilə Azərbaycanda Rusiyanın investisiya layihələrinin inkişafına nail olmaqdır.
""Rosselxozbank"ın nümayəndəliyi yaxın vaxtlarda filial statusu almağa istiqamətlənib ki, o, kənd təsərrüfatının kreditləşməsi ilə tam məşğul ola biləcək və bunda maraqlıdır", - nümayəndəliyin rəhbəri bildirib.
Rusiya ilə Azərbaycan arasında təsərrüfat əlaqələri ticari-iqtisadi, elmi-texniki və humanitar inkişaf üzrə irəliyə doğru hərəkət edir.
2008-ci ildə iki ölkə arasında mal dövriyyəsinin həcmi 2,4 milyard dollar təşkil edib. İdxalın ümumi həcmində kənd təsərrüfatı məhsullarının payı 53,5 faiz, ixracda 22,6 faiz təşkil edir.
2009-cu ildə Rusiya ilə Azərbaycan arasında qarşılıqlı mal dövriyyəsi 1,816 mlrd dollar səviyəsində olub. Azərbaycanın statistik məlumatlarına görə, ötən il mal dövriyyəsi altı faiz, Rusiya tərəfinin məlumatına görə isə 25 faiz azalıb.
"Rosselxozbank"ın əsas məqsədi RF kənd təsərrüfatı malları istehsalçıları və kənd əhalisinin bank məhsulları və xidmətlərinə tələbatlarının keyfiyyətli və effektiv təmin olunması, Rusiyada aqrar-sənaye sektorunun müasir milli kredit-maliyyə sistemlərinin formalaşması və fəaliyyət göstərməsi, Rusiya Federasiyası aqrar-sənaye kompleksinin və kənd ərazilərinin inkişafına dəstəkdir.
"Rosselxozbank" bu gün yaxın xaricdə öz yerini fəal şəkildə genişləndirir. 2009-cu ildə Belarusda, Tacikistanda və Qazaxıstanda üç nümayəndəlik açılıb.
Bu gün respublikada Latviyanın "Parex Bank", Almaniyanın "Commerz Bank" və Türkiyənin "Citibank" səhmdar şirkətlərinin nümayəndəlikləri fəaliyyət göstərir.
