Azərbaycan, Bakı, 18 avqust /Trend, müxbir A.Axundov/
Azərbaycanın sığorta şirkəti "Paşa Sığorta" ASC 2011-ci ilin əvvəlində həyat sığortasında ixtisaslaşan törəmə strukturunu yaratmağı planlaşdırıb. Bu barədə çərşənbə günü şirkətin idarə heyətinin sədri Nofəl Rzayev deyib.
"Sığortanın strateji inkişaf planına görə, "Paşa Holdinq" Şirkətlər Qrupu 2011-ci ilin əvvəlində həyat sığortasında ixtisaslaşan şirkət açmağı planlaşdırıb", - Rzayev bildirib.
Həyat sığortası üzrə ayrı-ayrı şirkətlərin yaradılması "Sığorta fəaliyyəti haqqında" qanunda nəzərdə tutulub. Hazırda bazarda hələ ki "Atəşgah Sığorta" tərəfindən yaradılan "Atəşgah Həyat" şirkəti fəaliyyət göstərir. Rzayevin sözlərinə görə, cari ilin sonunadək bir neçə böyük sığorta şirkəti oxşar şirkətlər açmağı planlaşdırıb.
2008-ci ilin martında qüvvəyə minmiş "Sığorta fəaliyyəti haqqında" Qanuna uyğun olaraq sığorta şirkətlərinə həyat sığortası üzrə bağlanan müqavilələrə xidmətin göstərilməsinin başa çatdırılması üçün üç il müddət (2011-ci ilin martın 15-dək) ayrılıb. Sığortanın bu növü üzrə yeni müqavilələrin bağlanması artıq müstəsna olaraq bu məqsədlər üçün yaradılan ayr-ayrı strukturlar çərçivəsində mümkün olacaq.
Hazırda Azərbaycanda sığorta bazarında həyat sığortasının payı 1 faizdən azdır.
İyulun 3-də Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə-əmək qabiliyyətinin itirilməsi hallarından icbari sığorta haqqında" Qanunu təsdiq edib.
Rzayevin fikrincə, qanunvericiliyə əsasən bu sığorta növü ilə yalnız həyat sığortasına lisenziya alan ixtisaslaşmış sığorta şirkətləri məşğul ola bilərlər.
"Azərbaycanda bugünədək həyat sığortası ilə məşğul olan yalnız bir sığorta şirkət - "Atesgah Heyat" var. Deməli, istehsalatda bədbəxt hadisələr və peşə xəstəlikləri nəticəsində peşə-əmək qabiliyyətinin itirilməsi hallarından icbari sığortanın göstərilməsi fəaliyyətinə lisenziyanın alınması üçün yalnız "Ateshgah Life" müraciət edə bilər", - Rzayev bildirib.
"Paşa Holdinq"in tərkibində fəaliyyət göstərən "Paşa Sığorta" korporativ və fərdi müştərilərə 30 sığorta növü üzrə xidmət göstərir. Kapitallaşma göstəricilərinə görə "Paşa Sığorta" 9 milyon manat nizamnamə kapitalı və 18,5 milyon manat cari məcmu aktivlə ölkənin aparıcı sığortaçılarının ilk beşliyinə daxildır. 2007-ci ildən "Paşa Sığorta" Şirkətinin idarəetmə sistemi ISO 9001: 2000 beynəlxalq idarəetmə standartı üzrə Britaniyanın "Moody" agentlyi tərəfindən sertifikatlaşdırılıb. 2009-cu ildən "Paşa Sığorta" insan haqlarının müdafiəsi, ətraf mühitin mühafizəsi və korrupsiya əleyhinə mübarizə üzrə BMT-nin Qlobal Saziş Təşəbbüsünün (UN Global Compact Initiative) iştirakçısıdır.
"Paşa Sığorta"nın sığorta hadisələri üzrə birinci yarımillikdə həyata keçirdiyi ödənişlər 0,9 milyon manat təşkil edib. Sığorta hadisələri üzrə əsas ödəniş istiqamətləri avtomobil sığortası, tibbi sığorta, əmlak sığortası, həyat və bədbəxt hadisələrdən sığorta növləri olub.
Avqustun 18-nə rəsmi məzənnə 0,8038 AZN/USD təşkil edir.