Azərbaycan, Bakı, 19 avqust /Trend, müxbir N.İsmayılova/
Azərbaycanın bank sektorunun adekvatlıq göstəricisi qənaətbəxş səviyyədədir, birinci dərəcəli kapital isə ümumi kapitalın 83 faizini təşkil edib. Bu barədə Mərkəzi Bankın 2010-cu ilin birinci yarısının yekunları üzrə açıqlanan maliyyə sabitliyi hesabatında deyilir.
İlin əvvəli ilə müqayisədə bankların ümumi kapitalı 2,3 faiz artaraq 1,8 milyard manat, illik artım göstəricisi isə 9 faiz təşkil edib. Kapitalın davamlılığı, əsasən, səhmdarların vəsaitləri hesabına təmin olunub. Bankların nizamnamə kapitalı ötən ilə nisbətdə 12,6 faiz (146,8 milyon manat) artıb və kapitalın 73 faizini təşkil edib.
İlin birinci yarısında xarici səhmdarların bankların nizamnamə kapitallarına vəsait qoyuluşları 16,8 faiz (34,4 milyon manat) artıb və 238,8 milyon manat və ya ölkə bank sektorunun nizamnamə kapitalının ümumi həcminin 18,2 faizini təşkil edib.
Bank sektorunun kapital adekvatlığı AMB-nin 12 faizlik normativ tələbə müqabilində 17,2 faiz olub. Mərkəzi Bankın hesablamalarına görə, prezidentin kapitallaşdırmaya istiqamətlənən sığorta şirkəti və banklarının gəlir vergisindən azad edilməsi haqqında fərmanı 170 milyon məbləğində kapitalın yaradılmasına təkan olub.
Avqustun 19-na rəsmi məzənnə 0,8038 AZN/USD təşkil edir.