Azərbaycan, Bakı, 27 avqust /Trend, müxbir N.İsmayılova/
İyulda Azərbaycan banklarının depozit bazası 6,6 faiz azalıb, 2009-cu ilin iyuluna nisbətdə isə 0,3 faiz artıb. Bu barədə Azərbaycan Mərkəzi Bankının (AMB) məlumatında deyilir.
Mərkəzi Bankın məlumatına görə, iyulun sonuna bank depozitlərinin, hüquqi və fiziki şəxslərin əmanətlərinin ümumi həcmi 4401,4 milyon manat təşkil edib. Bu göstərici iyunun sonunda 4711,4 milyon manat, 2009-cu ilin əvvəlində isə 4390,4 milyon manat olub. Bu həcmdən 1958,5 milyon manat manat vəsaitlərinin, 2442,9 milyon manat valyutanın payına düşüb.
İyulda fiziki şəxslərin əmanət qoyuluşları 6 faiz artıb, hüquqi şəxslərin depozitlərinin həcmi isə 21,6 faiz azalıb. 2009-cu ilin iyuluna nisbətdə fərdi müştərilərin depozitləri 35,8 faiz, korporativ müştərilərin depozitləri isə 29,5 faiz artıb.
İyulun sonuna fiziki şəxslərin ölkə banklarında əmanətlərinin həcmi 2716,3 milyon manat təşkil edib. Bu göstərici iyunun sonunda 2562,8 milyon manat, 2009-cu il avqustun 1-nə isə 2000,8 milyon manat olub.
İyulun sonuna hüquqi şəxslərin depozitlərinin həcmi 1685,1 milyon manat təşkil edib. Bu göstərici iyunun sonunda 2148,6 milyon manat, 2009-cu il avqustun 1-nə isə 2389,6 milyon manat olub.
Avqustun 27-nə olan rəsmi məzənnə 0,8037 AZN/USD təşkil edir.