Azərbaycan, Bakı, 6 sentyabr /Trend, müxbir N.İsmayılova/
Dünya Bankının (DB) missiyası sentyabrın sonunda Azərbaycanda həyata keçirilən nəqliyyat layihələrinin icmalını aparacaq. Bu barədə bazar ertəsi DB-nin Bakı nümayəndəliyindən bildiriblər.
Bankın nümayəndəliyindən verilən məlumata görə, sentyabrın 20-dən sonra Hacıqabul-Bəhramtəpə avtomobil yolunun yenidən qurulması layihəsinin, eləcə də Bakı-Şamaxı-Muğan avtomobil yolunun genişləndirilməsi üzrə üçüncü magistral layihənin ikizolaqlıdan dördzolaqlıya çevrilməsinin icmalının aparılacağı gözlənilir. Bankın nümayəndə heyətinin tərkibi tərkibi hələ ki dəqiqləşdirilir.
Bank 2009-cu ildə Hacıqabul-Bəhramtəpə avtomobil yolunun yenidən qurulması layihəsinin həyata keçirilməsinə 175 milyon dollar həcmində kredit ayırıb. Layihə üçün ayrılan kredit vəsaitlərinin ümumi həcmindən 63 milyon dollar güzəştli kreditin payına düşüb. Yolun uzunluğu 116 kilometrdir. İkizolaqlı yolun tikintisini nəzərdə tutan bu layihənin ümumi dəyəri 200 milyon dollar təşkil edir.
Bakı-Şamaxı-Muğanlı yolunun uzunluğu 124 kilometrdir. Bank layihənin maliyyələşməsinə qarışıq kredit şəklində 241,6 milyon dollar ayıracaq. Onlardan 70 milyon dollar Beynəlxalq İnkişaf Assosiasiyasının (BİA DB qrupuna daxildir) 2010-cu maliyyə ili üçün Azərbaycana kvotasının güzəştli şərtləri əsasında nəzərdə tutulub. 171,6 milyon dollar Beynəlxalq Yenidənqurma və İnkişaf Bankının xətti ilə ayrılacaq. Qalan hissə dövlətin layihədə iştirak payına düşür. Layihənin ümumi dəyəri 356,15 milyon dollar təşkil edir.
Bakı-Şamaxı-Muğanlı yolu Bakını respublikanın qərb rayonları ilə birləşdirəcək. Layihənin əsas məqsədi nəqliyyat xərclərinin azaldılması, çıxışın və tranzitin artırılması, Azərbaycanın Şərq-Qərb dəhlizləri üzrə keçid üçün yol təhlükəsizliyinin təmin edilməsidir.
Bu yol layihəsi DB Direktorlar Şurasında 2006-cı il yanvarın 17-də təsdiqlənib. Kredit ehtiyatları Beynəlxalq Yenidənqurma və İnkişaf Bankının şərtləri ilə ayrılıb: 4 il güzəştli dövr olmaqla 20 il müddətinə və illik libor+0,5 faiz dərəcə ilə. Lakin əlavə maliyyələşdirmənin 10 il güzəştli dövr olmaqla 35 il müddətinə və illik 0,75 dərəcə ilə verilməsi planlaşdırılır.