Azərbaycan, Bakı, 27 sentyabr /Trend, müxbir A.Axundov/
Azərbaycanın sığorta şirkəti "Paşa Sığorta" sentyabr ayı ərzində orta hesabla üç milyon manat məbləğində sığorta haqqı yığmağı planlaşdırır. Bu barədə bazar ertəsi şirkətin İdarə Heyətinin sədri Nofəl Rzayev deyib.
"Yığımların bu həcminin köhnə müqavilələrin bərpası və yenilərinin imzalanması hesabına əldə edilməsi planlaşdırılır, - Rzayev bildirib. - Sentyabrda neft müqavilələri üzrə haqların ciddi artımı gözlənilir".
Onun sözlərinə görə, ayın sonunadək "Chirag oil project" (COP) layihəsi üzrə müqavilənin imzalanması gözlənilir. Bu müqavilədə "Paşa Sığorta" yerli sığortaçı kimi çıxış edir.
"Avqust-sentyabr ənənəvi olaraq müqavilələrin yenilənməsi və uzadılması dövrüdür, - Rzayev qeyd edib. - Bu isə biznesin normal gedişi deməkdir".
Onun sözlərinə görə, avqustda şirkət 2,5 milyon manatdan çox pul yığıb.
Maliyyə Nazirliyi nəzdində Dövlət Sığorta Nəzarəti Xidmətinin hesabatına əsasən, yanvar-avqustda "Paşa Sığorta" şirkətinin sığorta yığımlarının həcmi 7,08 milyon manat, ödənişlər 1,59 milyon manat təşkil edib. Sentyabr ayı ərzində ödənişlər sayəsində şirkətin sığorta haqlarının ümumi həcmi 10 milyon manatı ötəcək, halbuki 2010-cu ilin yekunlarına görə proqnozlar 10,5 milyon manat olub.
Bundan əvvəl Trend-ə Nofəl Rzayevin dediyi kimi, "Paşa Sığorta" "Azəri-Çıraq-Günəşli" yataqlarında neft hasilatının həcminin artırılmasını nəzərdə tutan "COP"un yerli sığortaçı tərəfdaşı seçilib.
Onun sözlərinə görə, ABŞ-ın sığorta brokeri "Marsh" şirkəti ilə layihənin sığorta hissəsi hazırlanır və oktyabrın 1-dək bütün polislərin buraxılması gözlənilir.
"Paşa Sığorta" ASC 2008-ci ildən etibarən Xəzərin Azərbaycan sektorunda "Azəri-Çıraq-Günəşli", "Şahdəniz" yataqlarının və Bakı-Tbilisi-Ceyhan layihəsinin işlənməsi üzrə layihələrin yerli sığortaçı tərəfdaşıdır.
"Paşa Sığorta" yerli strateji sığorta tərəfdaşı qismində sertifikatlaşdırmadan 2008-ci ilin iyulunda Londonda keçib.
Sığortaçı və neft-qaz layihələrinin operatoru BP arasında birgə razılaşma əməliyyat risklərinin açılışı, məsuliyyət və terrorizm risklərini və "Azəri-Çıraq-Günəşli" neft yataqları və "Şahdəniz" qaz-kondensat yatağı layihələrində risk və əmlak üzrə sığorta polislərinin, eləcə də Bakı-Tbilisi-Ceyhan boru kəmərinin istismarı üzrə risklərin rəsmiləşdirilməsi prosesini nəzərdə tutur.
"Paşa Sığorta" broker firması "Marsh"la və aparıcı beynəlxalq təkrar şığorta şirkətləri ilə tərəfdaşlıq edir.
"Paşa Holdinq"in tərkibində fəaliyyət göstərən "Paşa Sığorta" korporativ və fərdi müştərilərə 30 sığorta növü üzrə xidmət göstərir. "Paşa Sığorta" 28 milyon manat məcmu aktivi ilə kapitallaşmanın həcminə görə ölkənin üç aparıcı sığorta şirkətinə daxil olmaqla, ölkənin sığorta sektorunda biznesin rentabelliyinin ən yüksək göstəricilərindən birini saxlayır. Şirkətin nizamnamə kapitalı 20 milyon manatdır.
2007-ci ildən "Paşa Sığorta" şirkətinin idarəetmə sistemi ISO 9001: 2000 beynəlxalq idarəetmə standartı üzrə Böyük Britaniyanın "Moody's" agentlyi tərəfindən sertifikatlaşdırılıb. 2009-cu ildən "Paşa Sığorta" insan haqlarının müdafiəsi, ətraf mühitin mühafizəsi və korrupsiya əleyhinə mübarizə üzrə BMT-nin Qlobal Saziş Təşəbbüsünün (UN Global Compact Initiative) iştirakçısıdır.
Sentyabrın 27-nə olan rəsmi məzənnə 0,8029 AZN/USD təşkil edir.