Azərbaycan, Bakı, 5 oktyabr /Trend, müxbir A.Yusifzadə/
Hazırda İranda 16 xarici şirkət avtomobil istehsalı ilə məşğul olmaqda davam edir, eyni zamanda, Yaponiyanın "Toyota" və Cənubi Koreyanın "Kia Motors" şirkətləri bu ölkəyə avtomobil ixracını dayandırıblar. Bu barədə çərşənbə axşamı ISNA agentliyi məlumat verib.
"Peugeot", "Renault", "Nissan", "Volkswagen", "Hyundai Motors", "Citroen", "Suzuki", "Mazda", "Isuzu", MAN, "Scania", "Volvo", "Lifan" və KAMAZ avtomobil istehsalçıları hələ də İranda avtomobil istehsalı ilə məşğul olurlar.
İlin ilk beş ayı ərzində (İranda il martın 21-dən başlayır) İranda buraxılan xarici avtomobillərin sayı aşağıdakı kimidir:
- Fransanın "Peugeot" şirkəti iranlı tərəfdaşı "Iran Khodro" ilə birgə 190 mindən artıq avtomobil istehsal edib və İranda ən iri avtomobil istehsalçısıdır,
- Fransanın "Renault" şirkəti iranlı tərəfdaşları "Iran Khodro" və "Pars Khodro" ilə birgə 160 mindən çox avtomobil istehsal edib;
- "Nissan" iranlı tərəfdaşı "Pars Khodro" ilə birgə "Maxima", "Roniz" və digərləri də daxil olmaqla, 4000 mindən çox avtomobil istehsal edib;
- "Hyundai Motors" İranda 3172 mindən çox avtomobil istehsal edib və "Kia Motors"dan fərqli olaraq, İranda avtomobil istehsalını dayandırmağı planlaşdırmır;
- Fransanın "Citroen" şirkəti "Xantias" markalı 4450 avtomobil buraxıb.
"Suzuki" şirkəti İrana 1,8 min avtomobil idxal edib, "Mazda" və "Isuzu" İran bazarına müvafiq olaraq 12 min və 4926 min avtomobil çıxarıb, MAN şirkəti 17, "Scania" 349, "Volvo" 181, KAMAZ 447 avtomobil satıb.
