Azərbaycan, Bakı, 8 oktyabr /Trend, müxbirlər E.İsmayılov, A.Axundov/
Koreyanın "Ultra Construction & Engineering" tikinti şirkəti Azərbaycan Nəqliyyat Nazirliyinin "Azəryolservis" ASC-nin Masallı-Astara avtomobil yolunun iki hissəsinin tikintisi üzrə elan etdiyi tenderdə iştirak etmək niyyətindədir. Bu barədə cümə günü Bakıda olan şirkətin icraçı direktoru Hen Çon Kan deyib.
"Azəryolservis" ASC-nin bundan əvvəl elan etdiyi tenderdə iştirak üçün ərizə qəbulunun son tarixi oktyabrın 22-nə təyin olunub. Biz də orada iştirak etmək istəyirik", - icraçı direktor bildirib.
Tender Masallı-Astara avtomobil yolunun "B" hissəsinin (uzunluğu 22,85 km olan ikizolaqlı yolun 22,15-45 kilometrlikləri, iki müxtəlif səviyyəli yolayrıcıları, 11 körpü, drenaj sisteminin quraşdırılması) və Masallı-Astara avtomobil yolunun "C" hissəsinin (uzunluğu 16,4 km olan ikizolaqlı yolun 45-61,4 kilometrlikləri, iki müxtəlif səviyyəli yolayrıcıları, yeddi körpü və drenaj sisteminin quraşdırılması) tikintisini nəzərdə tutur.
Bundan əvvəl Asiya İnkişaf Bankı (AİB) Masallı-Astara avtomagistralının bir hissəsinin yenidən qurulması layihəsi çərçivəsində Azərbaycan tərəfindən kredit vəsaitlərindən istifadə üçün müddəti 31 dekabr 2013-cü il tarixədək uzadıb. Saziş 2008-ci ilin yanvarından qüvvəyə mindikdən etibarən kredit resursları demək olar istifadəsiz qalıb və onlardan istifadə müddəti 30 iyun 2010-cu il tarixdə başa çatıb.
Masallı-Astara yolu Asiya İnkişaf Bankının (AİB) 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.
Layihəyə başlamaq üçün başlıca məsələlərdən biri Masallı-Astara avtomagistralı yaxınlığında torpaq alışı planının həyata keçirilməsidir.
Kreditdən istifadənin yubanmasına səbəb layihə çərçivəsində işlərə başlamaq üçün Masallı-Astara avtomagistralı yaxınlığında torpaq sahələrinin alınması ilə bağlı olub. Kredit razılaşmasının şərtlərinə əsasən, torpaq alışı ilə bağlı məsələ 2010-cu ilin iyununadək həll edilməli idi. Hökumətdən bildirildiyi kimi, bu proses praktiki olaraq Masallı-Astara magistralının "A" hissəsində (21 kilometr uzunluğunda) başa çatıb ki, bu da bankın başlıca tələbi idi.
Cümə günü Nəqliyyat Nazirliyindən bildirildiyinə görə, "A" hissəsinin tikintisinə cari ilin sonunadək başlanılması planlaşdırılır. "Yolun bu hissəsi üzrə torpaqların alınması məsələsi başaçatma mərhələsindədir və cari ilin sonunadək tikinti işlərinə başlamaq planlaşdırılır", - mənbə qeyd edib.
Masallı-Astara avtomobil yolunun yenidən qurulmasına "Multitranche Financing Facility" (MFF) mexanizmi çərçivəsində 500 milyon dollar məbləğində kredit təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayırıb.
