Azərbaycan, Bakı, 20 oktyabr /Trend, müxbir A.Axundov/
Azərbaycanın "Akkord" Şirkətlər Qrupu Əfqanıstanda əməliyyatları genişləndirməyi və su rezervuarları, sənaye obyektləri və yaşayış binaları tikməyi planlaşdırır. Bu barədə çərşənbə günü şirkətin ictimaiyyətlə əlaqələr şöbəsinin direktoru Afaq Quliyeva deyib.
"Əfqanıstandakı layihə iki hissədən ibarətdir. Birinci hissəyə Heratda su rezervuarlarının tikintisi daxildir. Burada işlər dekabrda başlayacaq və üç ildən sonra başa çatacaq. İkinci hissəyə Məzari-Şərifdə sənaye və yaşayış binalarının tikintisini nəzərdə tutur. Orada işlərə artıq mayda başlanılıb və gələn ilin axırına başa çatdırılacaq", - Quliyeva qeyd edib.
Onun sözlərinə görə, hər iki layihənin ümumi dəyəri 170 milyon dollar təşkil edir.
"Layihələrin sifarişçisi və maliyyə mənbəyi Əfqanıstan hökumətidir", - Quliyeva vurğulayıb.
Quliyevanın sözlərinə görə, ilin sonunadək şirkət Azərbaycanda tikilən bütün evləri istismara verməyi planlaşdırır.
"Yeni ildən etibarən biz binaları yeni sistemlə tikəcəyik. Biz artıq təmir edilməmiş binaları satmayacağıq", - Quliyeva vurğulayıb.
Əfqanıstandakı layihələr "Akkord"un yeganə layihələri deyil. Ötən ilin dekabrında "Akkord" Qazaxıstanda Türkiyənin "Okan Holding" şirkəti ilə birlikdə keçirilən yol layihəsinin tikintisi üzrə tenderin qalibi olub.
Layihə Mərkəzi Asiya Regional İqtisadi Əməkdaşlıq Layihəsinin (CAREC) - Qərbi Avropa - Qərbi Çin - Cənub-Qərb yol layihəsi olan Beynəlxalq Nəqliyyat Dəhlizinin tərkib hissəsidir. Layihə üzrə yolun ümumi uzunluğu 2787 km təşkil edir və 2006 - 2012-ci illərdə həyata keçirilməsi planlaşdırılır. Layihənin başlıca investoru Dünya Bankıdır.
Bundan əvvəl şirkət Gürcüstanda Dünya Bankının maliyyələşdirdiyi beynəlxalq tenderin qalibi olub və Gürcüstanda Sveneti-Ruisi yol layihəsinin və uzunluğu 877 metr olan körpünün tikinti layihəsini həyata keçirir.
