Azərbaycan, Bakı, 23 oktyabr/Trend/
Dekabrın 1-dək "Azərbaycan Dəmir Yolları" QSC Dünya Bankına (DB) "Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın həyata keçirilməsi çərçivəsində investisiya qərarlarını təqdim edəcək. Bu barədə şənbə günü QSC-nin rəsmi saytında yerləşdirilən məlumatında deyilir.
Məlumatda deyildiyinə görə, bu məqsədlə müvafiq departament və xidmətlər təxirəsalınmadan işçi plan hazırlayıb təqdim etməlidirdər. Təqdim olunan sənədlər layihə işçi qrupu (LİQ) və məsləhətçi şirkətlərin nümayəndələri ilə birlikdə müzakirə edilərək, kollegial qərarlar qəbul olunacaq.
Dəmir yollarının inkişafına dair proqram Azərbaycan Prezidenti tərəfindən iyulun 6-da imzalanıb. Proqram dəmir yollarının, siqnal sisteminin və rabitə əlaqəsinin bərpasını, yeni lokomotivlərin alınmasını nəzərdə tutur.
Dəmir yolu və ticarət üzrə tranzitə yardım layihəsinin ümumi dəyəri 673,8 milyon dollar təşkil edir. Bundan DB-nin kredit payına 450 milyon dollar düşür. Layihə ümumi dəyəri 1,2 milyard manat olan 2010-2014-cü illərdə Azərbaycanın dəmiryol nəqliyyatı sisteminin inkişafı üzrə Dövlət Proqramının bir hissəsidir.
DB-nin kredit resursları Beynəlxalq Yenidənqurma və İnkişaf Bankının (BYİB) xətti ilə 23 il müddətinə, səkkiz ili güzəştli olmaqla, altıaylıq "libor" plyus dərəcəsi ilə verilir. Borcalan tərəfindən ödəniləcək kredit üzrə komisyon 0,25 faiz səviyyəsində müəyyənləşib. Kredit üzrə ödənişlər ildə iki dəfə - iyunun 15-də və dekabrın 15-də ediləcək.