Azərbaycan, Bakı, 1 noyabr /Trend, müxbir А.Axundov/
2010-cu ilin ilk doqquz ayı ərzində kənd təsərrüfatı sahəsində fəaliyyət göstərən sahibkarlara 23,2 milyon manat dəyərində güzəştli kredit ayrılıb. Bu barədə kənd təsərrüfatı naziri İsmət Abasov rəsmi mətbuatda dərc olunmuş məqaləsində bildirib.
"Dövlət büdcəsi hesabına Azərbaycan Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi üçün 20 milyon manat və əvvəlki illərdə verilən 3,2 milyon manat həcmində kreditlərin qaytarılması müqabilində ölkənin 46 rayonunda 882 sahibkara müvəkkil kredit təşkilatları vasitəsilə ümumi həcmi 23,2 milyon manat olan güzəştli kredit verilib", - Abasov qeyd edib.
Onun sözlərinə görə, 286 kredit əkinçilik, 203 - heyvandarlıq, 55 - arıçılıq, 38 - bağçılıq, 33 - quşçuluq, 6 - balıqçılıq, 1 - istixanaların inkişafı, 1 kredit isə texnika və gübrələrin alınması üzrə fəaliyyət göstərən sahibkarlara verilib.
"Kredit vəsaitlərinin verilməsi ilə həyata keçirilən layihələr nəticəsində 1620 yeni iş yeri yaradılıb", - nazir bildirib.
Onun sözlərinə görə, kreditin orta məbləği 26,3 min manat təşkil edib.
Nazirin sözlərinə görə, həmçinin, hesabat dövründə Dünya Bankının dəstəyi ilə həyata keçirilən "Kreditləşdirmə və kənd təsərrüfatının inkişafı" layihəsi çərçivəsində icraçı kredit agentlikləri vasitəsilə borc alanlar və kredit ittifaqlarının birgə qrupunun 13 715 üzvünə 26,1 milyon manat məbləğində kredit verilib.
"Bu kreditlər kənd təsərürfatının inkişafını dəstəkləməklə yanaşı, regionlarda miqrasiyanın qarşısını almağa da kömək edir", - məqalədə bildirilir.
Həmçinin, nazirin sözlərinə görə, müvəkkil kredit təşkilatları vasitəsilə kənd təsərürfatı məhsullarının istehsalı və emalı ilə məşğul olan 66 sahibkara 7,5 milyon manat məbləğində kredit verilib.
Noyabrın 1-nə olan rəsmi məzənnə 0,8005 AZN/USD təşkil edir.
