Azərbaycan, Bakı, 24 noyabr /Trend, müxbir A.Axundov/
Xarici şirkətlərin Azərbaycanın sığorta bazarına gəlişi göstərilən xidmətlərin keyfiyyətini artıracaq və peşəkarlığın yüksəldilməsinə xidmət edəcək. Azərbaycan-Türkiyə sığorta şirkəti "Başak-İnam Sığorta"nın baş direktoru Orxan Həsənov bu fikirdədir.
"Hazırda xarici şirkətlərin Azərbaycanın sığorta bazarına marağının artması müşahidə edilir", - Həsənov qeyd edib.
Onun sözlərinə görə, bununla yanaşı, indiki şəraitdə Azərbaycan bazarına çıxış xarici şirkətlər üçün cəlbedici deyil.
"Məsələn, Türkiyədə sığorta bazarı 10 milyard dollar qiymətləndirilir, sığorta şirkətini yaratmaq üçün beş milyard dollar tələb olunur, yəni, böyük səy göstərmədən il ərzində 15-20 milyon dollar yığmaq olar. Bunu nəzərə alaraq, bu gün Türkiyə bazarının 70 faizə yaxınına xarici sığortaçılar sahibdirlər. Bu baxımdan Azərbaycan xarici şirkətlər üçün o qədər də cəlbedici deyil", - Həsənov qeyd edib.
Hazırda Azərbaycanda 27 sığorat şirkəti fəaliyyət göstərir. Onlardan beşi xarici kapitallıdır. Bunlar MBASK, "Çartis Azərbaycan", "Atəşgah Sığorta", "Temz Sığorta Qrupu" və "Başak-İnam Sığorta" şirkətləridir. 2010-cu ilin noyabrın 1-nə olan vəziyyətə görə, bu beş sığortaçının yığdığı sığorta haqlarının payı Azərbaycanın sığorta bazarının ümumi həcminin 17,32 faizini təşkil edir. Doqquz ay ərzində bu şirkətlər tərəfindən sığorta yığımlarının 130,3 milyon manat ümumi həcmində 22,57 milyon manat yığılıb.