Azərbaycan, Bakı, 24 dekabr /Trend, müxbir E.İsmayılov/
Bu gün saat 15:00-da "Azərbaycan Hava Yolları" QSC Airbus-320 markalı iki təyyarə alacaq. Bu barədə Trend-ə cümə günü QSC-nin mətbuat xidmətinin rəhbəri Məhərrəm Səfərli məlumat verib.
Səfərlinin sözlərinə görə, QSC Airbus markalı altı təyyarə almalıdır. Onlardan dördü Airbus-320, ikisi isə Airbus-319-dur.
"İki Airbus-320 təyyarəsi bu gün, ikisi isə gələn ilin yanvarında alınacaq. İki Airbus-319 gələn ilin birinci rübünün sonunadək gətiriləcək", - Səfərli bildirib.
Onun sözlərinə görə, təyyarələr aparıcı Avropa şirkətlərinin kreditləri əsasında alınır. Təyyarələrin hamısı 2007-ci ildə istehsal olunub.