Azərbaycan, Bakı, 24 dekabr /Trend, müxbir A.Axundov/
2010-cu ilin 11 ayı ərzində Türkiyədə xarici kapitalın iştirakı ilə 2196 şirkət qeydiyyata alınıb ki, bu şirkətlərin 191-i noyabrda yaradılıb. Bu barədə cümə günü Türkiyənin Palata və Birjalar Birliyinin saytında yerləşdirilmiş məlumatda deyilir.
Bu şirkətlərdən 323-ü İran, 257-si alman, 134-ü rus və 116-sı isə Azərbaycan kapitallıdır.
1942 şirkət məhdud məsuliyyətli cəmiyyət, 254-ü səhmdar cəmiyyətdir.
Yanvar-noyabr aylarında yaradılan birgə kapitallı şirkətlərin ümumi kapitalı 959,816 milyon lirə (619,556 milyon dollar) təşkil edir ki, bu məbləğin 542,626 milyonu (350,262 milyon dollar) və ya 56,53 faizi xarici kapitallı şirkətlərin payına düşür.
Ümumilikdə yanvar-noyabrda Türkiyədə 45 982 şirkət və korporativ yaradılıb ki, bu da ötən ilin analoji dövr göstəricisindən 14,29 faiz çoxdur. 2009-cu ildə bu göstərici 40 232 olub.
Dekabrın 24-nə olan rəsmi məzənnə 1,5520 TL/USD təşkil edir.
