Azərbaycan, Bakı, 7 yanvar /Trend, müxbir Ü.İsmayılova/
Dünyada böyük iyirmiliyə daxil olan auditor şirkətlərinin əksəriyyəti Azərbaycan auditor bazarına daxil olmaqda maraqlıdırlar. Bu barədə cümə günü Azərbaycan Auditorlar Palatası rəhbərinin müavini Nəcəf Talıbov bildirib.
"İri beynəlxalq auditor şirkətlərinin marağı Azərbaycan iqtisadiyyatının dünya iqtisadiyyatına fəal inteqrasiyası ilə bağlıdır", - Talıbov hesab edir.
Onun sözlərinə görə, yerli bazara artan marağın daha bir səbəbi Azərbaycanda beynəlxalq maliyyə hesabatlılığı sisteminin (BMHS) və beynəlxalq audit standartlarının tətbiqidir.
Talıbov hesab edir ki, beynəlxalq auditorları Azərbaycanda, həmçinin ölkə iqtisadiyyatının vəziyyətini qiymətləndirməyə imkan verən ölkənin suveren reytinqi cəlb edir. Standard & Poor's kredit reytinqləri xidməti Azərbaycan üçün "ВВ+/В" səviyyəsində uzunmüddətli və qısamüddətli suveren kredit reytinqini təsdiqləyib. Reytinqlər üzrə proqnoz əvvəlki kimi "müsbət"dir. Valyutaların köçürülməsi və mübadiləsi risklərini qiymətləndirilməsi "BBB-" səviyyəsində qalır.
Fitch Ratings beynəlxalq reytinq agentliyi Azərbaycanın xarici və milli valyutada defolt emitenti reytinqini (DER) "BBB-" uzunmüddətli səviyyəyədək qaldırıb. Hər iki reytinq üzrə proqnoz "sabit"dir. Eləcə də Fitch Azərbaycanın ölkə üst həddini "BBB-"-dək və xarici valyutada qısamüddətli DER-i "F3"-dək artırıb.
Azərbaycanda 2010-cu il yanvarın 1-dən beynəlxalq audit standartları tətbiq edilir, BMHS-yə keçid isə 2008-ci ildən başlayıb.
Azərbaycan Auditorlar Palatası 1995-ci ilin sentyabrında təsis olunub və 1996-cı ilin aprelindən aktiv fəaliyyətə başlayıb. Azərbaycanda "Auditor fəaliyyəti haqqında" qanun 1994-cü ildə qəbul edilib. Bu gün Azərbaycanda dünyada məşhur olan PricewaterhouseCoopers, Deloitte, Ernst&Young, KPMG, BDO Azerbaijan və digər bu kimi şirkətlər iştirak edir.
