Azərbaycan, Bakı, 24 yanvar /Trend, müxbir N.İsmayılova/
Dünya Bankı (DB) ölkə hökuməti ilə birgə maliyyələşdirilən "Azərbaycanda kapital bazarının inkişafı" layihəsinin yekun variantının hazırlanmasının cari ilin fevral-mart aylarında başa çatacağını gözləyir. Bu barədə bazar ertəsi bankın Bakı nümayəndəliyindən məlumat verilib.
"artıq apreldə layihə təsdiqlənmək üçün DB Direktorlar Şurasına təqdim oluna bilər", - bankdan bildiriblər.
Məlumata görə, DB Azərbaycanda kapital bazarının inkişafına təxminən 10 milyon dollar ayrılmasının mümkünlüyünə baxır, layihənin ümumi məbləği isə 12-13 milyon dollara yaxındır.
Qiymətli Kağızlar Dövlət Komitəsinin sədri Rüfət Aslanlının sözlərinə görə, bu layihə çərçivəsində növbəti mərhələdə əsas diqqət qanunvericilik bazasının təkmilləşdirilməsinə, bazar infrastrukturunun və vahid platforma çərçivəsində qiymətli kağızlarla ticarət proseslərinin avtomatlaşdırılması proseslərinin başa çatdırılmasına yönəldiləcək, eləcə də bazarda tələblə təklifin stimullaşdırılması üzrə tədbirlər həyata keçiriləcək.
Yanvarın 11-dən 21-dək DB-nin maliyyə proqramlarının rəhbəri və bankın Cənubi Qafqaz üzrə maliyyə məsələlərinin əlaqələndiricisi Maykl Edvarsın rəhbərlik etdiyi missiya Bakıda olub.
Bu layihənin maliyyələşdirilməsi məqsədilə 2011-ci il maliyyə ilində Beynəlxalq İnkişaf Assosiasiyasının (DB qrupuna daxildir) Azərbaycan üçün 73 milyon dollar məbləğində müəyyən edilən kvotasından güzəştli kredit verilməsi mümkündür. İqtisadi Məsələlər üzrə İsveçrə Dövlət Katibliyi (SECO) də bu layihənin komponentlərindən birini maliyyələşdirəcək və bu gün PAD (Project Appraisal Document) hazırlığı üzrə işlər aparılır. SECO bu layihə çərçivəsində kapital bazarı oyunçularının möhkəmləndirilməsi və bazar institutlarının inkişafı üçün 1,7 milyon dollar məbləğində texniki yardımın göstərilməsini planlaşdırır.
