Azərbaycan, Bakı, 25 yanvar /Trend, müxbir İ.Xəlilova/
Maliyyə vasitəçiliyinin və kreditləşmənin həcminin artırılması üzrə imkanların müzakirəsi üçün Azərbaycan Mərkəzi Bankı (AMB) banklarla görüş keçirməyi planlaşdırır. Trend-in məlumatına görə, bu barədə dünən AMB idarə heyətinin sədri Elman Rüstəmov Azərbaycan Dövlət Televiziyasına müsahibəsində bildirib.
"Biz iqtisadi inkişaf naziri Şahin Mustafayevlə bankların problemləri ilə tanış olmaq, maliyyə vasitəçiliyinin və kreditləşmənin həcminin artırılması üzrə imkanların müzakirəsi üçün bank sektoru ilə görüşün keçirilməsi barədə razılığa gəlmişik", - Rüstəmov bildirib.
"Bankların kredit qoyuluşlarının həcminin artırılması üçün vəsaitləri və imkanları var və aydındır ki, böhran dövründə banklar obyektiv səbəblərə görə müştəri seçimində ehtiyatlı olublar. Lakin demək olar ki, Azərbaycanda böhranın nəticələri tam aradan qaldırılıb və 2011-ci ildə biz banklardan kredit siyasətinin həyata keçirilməsində daha çox fəallıq gözləyirik", - Rüstəmov qeyd edib.
Bununla yanaşı, o, bankların dövlətdən hansı dəstəyi gözlədiklərini öyrənmək üçün onlarla görüşün keçirilməsinin zəruri olduğunu hesab edir.
Rüstəmov böhran dövründə əmanətlər və kreditlər üzrə dərəcələrin bir neçə bənd azalmasını əlamətdar sayıb. Azərbaycan üçün effektiv depozit dərəcəsi 10-11 faiz təşkil edir, halbuki onlar əvvəllər ölkədə bir qədər yüksək olub. Bu gün kredit dərəcələri 15-16 faiz səviyyəsində formalaşıb.
Mərkəzi Bankın rəhbəri hesab edir ki, Azərbaycanda depozit və kreditlərin yüksək dərəcədə olmasının səbəbi aydınlaşdırılmalıdır. Bu günə Azərbaycan iqtisadiyyatında kredit qoyuluşlarının payı 9 milyard manatı ötür. Ötən il ərzində 4 milyard manatdan çox məbləğdə kredit verilib, halbuki güzəştli kreditlərin payı 120-150 milyon manat təşkil edib.
