Azərbaycan, Bakı, 4 fevral /Trend, müxbir İ.Xəlilova/
Asiya İnkişaf Bankı (AİB) Azərbaycana yol layihələri üzrə yeni əlaqələndiricisini - Mərkəzi və Qərbi Asiya Departamentinin mütəxəssisi Reddi Batulanı göndərib. Dünən ölkə hökumətindən bildirilib.
"AİB missiyası üç günlük səfər çərçivəsində bankın Azərbaycanda maliyyələşdirdiyi yol layihələrinin həyata keçirilməsinin gedişi ilə tanış olacaq", - hökumətdən deyiblər.
Hazırda AİB Masallı-Astara yolunu maliyyələşdirir. Yaxın vaxtılarda burada tikinti işlərinə və Gəncə dairəvi yolunun bərpasına başlanılması planlaşdırılır.
Bank onların reallaşdırılması üçün ümumi dəyəri 500 milyon dollar olan "Multitranche Financing Facility" (MFF) layihəsindən 255,4 milyon dollar ayırıb.
Uzunluğu 39 kilometr olan Gəncə dairəvi yolunun bərpasının 2011-ci ilin sonlarında başa çatdırılması planlaşdırılır. İşlər İtaliyanın "İmpreza" podratçı şirkəti və Azərbaycanın "AKKORD" subpodratçı şirkəti tərəfindən həyata keçirilir.
AİB kreditinin verilməsi müddətinin 2013-cü ilin sonlarına qədər uzadılmasına baxmayaraq, Masallı-Astara yolunun tikintisinin 2012-ci ildə başa çatdırılması planlaşdırılır.
Yolun "А" hissəsinin tikintisinin podratçısı "Azərinşaatservis" şirkəti seçilib. Şirkət 22,15 kilometrlik hissədə tikinti işləri aparır. Yerdə qalan iki hissə üzrə podratçılar hələlik müəyyən edilməyib, çünki tender proseduru davam etdirilir.
Birinci sahə üzrə podratçı ikizolaqlı yol, iki yol qovşağı, doqquz körpü, drenaj sistemi və kəsişən yolların üzərində bir körpü tikməlidir.
Avtomobil yollarının tikintisi AİB-in 200 milyon dollarlıq vəsaiti və Azərbaycan hökumətinin 49 milyon dollarlıq payı hesabına həyata keçiriləcək.
Masallı-Astara avtomobil yolunun ümumi uzunluğu 62 kilometr rtəşkil edir.