Azərbaycan, Bakı, 15 fevral /Trend, müxbir N.İsmayılova/
Beynəlxalq Valyuta Fondu (BVF) və Dünya Bankı (DB) Azərbaycan hökuməti ilə texniki yardım proqramı çərçivəsində (FSAP) ölkənin maliyyə sektorunun qiymətləndirilməsinin aparılması ilə bağlı müzakirələr aparır. Trend-in məlumatına görə, bu barədə Beynəlxalq Valyuta Fondunun (BVF) ölkə üzrə missiyasının yeni rəhbəri, fondun Yaxın Şərq və Mərkəzi Asiya üzrə Departamentinin (MCD) direktor müavini Nədim İlahi Azərbaycana səfərinin yekunları üzrə mətbuat konfransında deyib.
"Səfər çərçivəsində biz hökumətlə növbəti qiymətləndirmə məsələsini müzakirə etdik və onun keçirilməsi ilə bağlı ümumi qərara gəldik", - İlahi qeyd edib.
2003-cü ildə BVF və DB Azərbaycanda bank, sığorta və qiymətli kağızlar bazarlarının beynəlxalq standartlara uyğun olmasına dair qiymətləndirmə aparıblar. Lakin 2005-ci ilin əvvəlindən bank qanunvericiliyi yenilənib. Bu səbəbdən də qiymətləndirmənin nəticələri mahiyyətini itirib.
Azərbaycanın maliyyə sektorunun qiymətləndirilməsi proqramı çərçivəsində DB və BVF mütəxəssisələri stress-testlər (göstəricilərin aşağı düşməsində davranışın iqtisadi modelləşdirilməsi və simulyasiyası) keçiriblər. Bu testlər ölkənin bank sisteminin ümumi göstəricilərinin enməsi riskinə yüksək qarşıdurma qabiliyyətini aşkarlayıb. Testlər göstərib ki, göstəricilərin 50-70 faiz (ən pis hal) pisləşməsində belə, bank sistemi kapitalın sıfır səviyyəsinə enməyəcək, onun aktivləri isə öhdəliyi ötəcək.
