Azərbaycan, Bakı, 23 fevral /Trend, müxbir İ.Xəlilova/
Almaniyanın "KfW" bankının ölkədəki maliyyə layihələri üzrə meneceri Gerald Hünberqin Azərbaycanda həyata keçirilən maliyyə layihələrinin icmalını aparmar məqsədilə martın 1-dən 11-dək Bakıda səfərdə olacağı gözlənilir. Bu barədə çərşənbə günü bankın Bakı ofisindən məlumat verilib.
Səfər zamanı Azərbaycanın kənd yerlərində aqromaliyyələşdirmə layihəsinin davam etdirilməsi imkanları müzakirə olunacaq. Bank ikinci maliyyələşdirmə fazası üzrə ölkəyə üç milyon avro ayırmağı planlaşdırır.
"Birinci faza çərçivəsində olduğu kimi, bu vəsaitlər subardinasiya olunmuş kreditlər kimi ayrılacaq. Belə kreditlərin ikinci səviyyəli kapitala daxil edilməsinə baxmayaraq, onların vəsaitləri regionlardakı kənd əhalisinin kreditləşdirilməsi üçün nəzərdə tutulub", - "KfW"dən deyiblər.
Layihənin birinci fazasının dəyəri beş milyon avro təşkil edir ki, ona da kredit hissəsi ilə yanaşı, texniki yardım da daxil edilib. Kredit resursları iki kredit təşkilatı "Bank Respublika" və qeyri-kredit təşkilatı "CredAgro" arasında bölüşdürülüb. "Dəmirbank" texniki yardım alıb. "Bank Respublika" 1,5 milyon avro, "CredAgro" isə 2 milyon avro alıb.
Layihə çərçivəsində birinci mərhələ Şəki-Zaqatala və Qaxın kənd yerlərini əhatə edib.
Kreditlərin şərtləri Azərbaycan-Almaniya Fondu vasitəsilə bankların maliyyələşdirilməsi şərtləri ilə oxşar olub.
Hazırda "KfW" aqrar sektorun, kiçik və orta sahibkarlığın inkişafının maliyyələşdirilməsi ilə yanaşı, "Access Bank"ın kapitalında iştirak edir. Alman bankının maliyyə dəstəyi ilə kredit-zəmanət fondu yaradılıb, Azərbaycanın Əhalinin Əmanətlərinin Sığortalanması Fonduna investisiyalar yatırılıb. Əməkdaşlıq başlanandan "KfW" Azərbaycan layihələrinin güzəştli maliyyələşdirilməsinə üstünlük verib (40 il müddətinə 10 ili güzəştli olmaqla və illik 0,75 faizlə), lakin son illər bank qarışıq kreditlərə daha çox üstünlük verir.
Azərbaycanın "KfW"lə əməkdaşlığı 1994-cü ildən başlayıb. Bankın ölkədə strateji fəaliyyət istiqamətləri enerji, su və digər infrastrukturun bərpası, maliyyə, bank, özəl sektorun, səhiyyə sisteminə, ətraf mühit və s. inkişafına dəstək verməkdir. Azərbaycan üzrə portfel hazırda 200 milyon avroya çatır.
Cənubi Qafqaz regionuna xidmət göstərmək üçün bank ötən ilin mayında Tbilisidə alman əməkdaşlıq evini açıb. Bununla əlaqədar, "KfW"in ofisinin Azərbaycana nümayəndəlik şəklində köçürülmə məsələsi gündəlikdən çıxarılıb; belə ki, bank regiondakı əməliyyatları Tbilisidəki Əməkdaşlıq Evi vasitəsilə tənzimləyəcək.