Azərbaycan, Bakı, 24 fevral /Trend, müxbir N.İsmayılova/
Azərbaycan bankı "Paşa Bank" 2011-ci ildə ticari maliyyələşdirməni 60-65 milyon manatadək genişləndirmək niyyətindədir. Trend-in məlumatına görə, bu barədə cümə axşamı bankın idarə heyətinin sədri Fərid Axundov 2010-cu ilin fəaliyyət yekunlarına həsr olunmuş mətbuat konfransında bildirib.
Bu gün bankın ticari maliyyələşdirmə portfeli 37 milyon manat təşkil edir ki, bu da 2009-cu ilin müvafiq göstəricisindən 32 faiz çoxdur.
"Bundan əvvəl biz Almaniyanın iri ixrac-idxal kredit agentliyi "Euler Hermes"in zəmanəti altında "Commerzbank"dan 20 milyon avro məbləğində kredit xəttinin cəlb edilməsi haqqında saziş imzalamışıq, hazırda Fransanın "Coface" agentliyi ilə Fransa bankından maliyyələşmənin cəlb edilməsi üçün danışıqlar aparılır", - Axundov bildirib.
Onun sözlərinə görə, "Paşa Bank" həmçinin Qara dəniz Ticarət və İnkişaf Bankı (QTİB) ilə Azərbaycanda QTİB-in kredit risklərinin zəmanət verilməsi üçün nəzərdə tutulan 4 milyon dollar məbləğində ilk saziş bağlayıb. Saziş uzunmüddətli xarakter daşıyır və beş il müddətinə bağlanıb.
Hazırda bank İslam İnkişaf Bankı (İİB) ilə də danışıqlar aparır.
"Biz onlarla görüşürük, təklif var və İİB proqramı çərçivəsində kreditləşmənin mümkünlüyünə dair müzakirələr aparılır. Bizim üçün islam bankçılığı şərtləri üzrə kreditləşməni öyrənmək də maraqlıdır və bu il bankla məsləhətləşmələri davam etdirəcəyik. Bu gün müqavilə bağlayıb-bağlamayacağımızı söyləmək çətindir, lakin bu mövzunun bizim üçün maraqlı olduğu birmənalıdır", - Axundov deyib.
"Paşa Bank" 2007-ci ilin iyununda təsis edilib və Azərbaycan Mərkəzi Bankının 2007-ci il 28 yanvar tarixli lisenziyası əsaında fəaliyyət göstərir.
"Paşa Bank" ASC "Pasha Insurance", "Pasha Life", "Pasha Travel" və "Pasha Construction" ilə birgə "Pasha Holding"in tərkibinə daxildir. "Pasha Holding" klassik holdinq yox, faktiki olaraq investisiya şirkətidir.
Bankın səhmdarları strukturunda pay bölgüsü aşağıdakı kimidir: "Pasha Holding"ə səhmlərin 60 faizi, "ADOR ltd" şirkətinə 30 faiz, Arif Paşayevə isə 10 faiz məxsusdur.
Fevralın 24-nə olan rəsmi məzənnə 0,7943 AZN/USD təşkil edir.
