Azərbaycan, Bakı, 5 mart /Trend, müxbir N.İsmayılova/
Azərbaycan Dövlət Gömrük Komitəsi 2011-ci ilin yanvarında dünyanın 94 ölkəsi ilə aparılan xarici ticarət əməliyyatlarının yekunlarını elan edib. Bu barədə şənbə günü komitədən bildiriblər. Ölkənin ümumi mal dövriyyəsi 2,166 milyard dollar təşkil edib ki, bu da ötən ilin analoji dövrünün göstəricisini 51,66 faiz üstələyib. Xarici ticarət əməliyyatlarında 979,81 milyon dollar mübət saldo yaranıb.
Ötən ay ərzində xarici ticarət əməliyyatlarında 1821 hüquqi və fiziki şəxs qeydə alınıb. Onlardan 1299 nəfəri hüquqi, 522-si isə fiziki şəxsdir.
Yanvar ayı ərzində ixrac əməliyyatları 1,573 milyard dollar təşkil edib ki, bu da 2010-cu ilin yanvarı ilə müqayisədə 10,14 faiz çoxdur.
İxracda dövlət sektorunun payı 1,499 milyard dollar, özəl sektorun payı isə 66,21 milyard dollar, fiziki şəxslərin payı 7,37 milyon dollar təşkil edib.
Yanvarda idxal 592,989 milyon dollar olub ki, bu da 2010-cu ilin yanvarı ilə müqayisədə 62,91 faiz çoxdur.
İdxal əməliyyatlarında dövlət sektorunun payı 198,37 milyon dollar, özəl sektorun 365,77 milyon dollar, fiziki şəxslərin 28,85 milyon dollar olub.
