Azərbaycan, Bakı, 14 mart /Trend, müxbir Ü.İsmayılova/
Azərbaycanda elan olunmuş "Turizm ili" çərçivəsində Standartlaşdırma, Metrologiya və Patent üzrə Dövlət Komitəsi yanında xüsusi Texniki komitə yaradılacaq. Bu barədə bazar ertəsi Trend-ə komitənin mətbuat xidmətinin rəhbəri Fazil Talıblı bildirib.
"Texniki komitə Standartlaşdırma üzrə Dövlət Komitəsi və Mədəniyyət və Turizm Nazirliyinin mütəxəssislərinin birgə iştirakı ilə yaradılacaq. Komitəyə Mədəniyyət Nazirliyinin nümayəndəsi rəhbərlik edəcək", - Talıblı bildirib.
Onun sözlərinə görə, dövlət komitəsi rəhbərinin əmri əsasında yaradılacaq Texniki komitə əsasən forum xarakteri daşıyacaq. Forumun toplantılarında dövlət komitəsi və nazirliyin nümayəndələri ilə yanaşı, QHT və digər ictimai təşkilatların təmsilçiləri və maraqlanan şəxslər iştirak edəcəklər.
Forumun əsas vəzifəsi mövcud problemlərin müzakirəsi, eləcə də ölkədə turizm sahəsində iş və xidmətlərin keyfiyyətinin beynəlxalq standartlara uyğun olaraq yaxşılaşdırılması üçün standart və tələblərin tətbiqi üzrə təkliflərin təqdimatı olacaq.
"2011-ci ildə Azərbaycanda elan olunmuş "Turizm ili" çərçivəsində bir sıra milli standartların təsdiq olunacağı gözlənilir, eləcə də yaxın vaxtlarda turizm göstəriciləri üzrə standartlar təsdiq ediləcək", -Talıblı deyib.