"Azərbaycan Dəmir Yolları" QSC xarici bazarlara dəmir filizi nəql edir
Azərbaycan, Gəncə, 17 mart /Trend, xüsusi müxbir J.Qurbanova/
Ötən ilin oktyabrından bu günədək "Azərbaycan Dəmir Yolları" QSC tərəfindən xarici bazarlara 75 min tona yaxın dəmir filizi daşınıb. Bu barədə cümə axşamı QSC-nin qərb istiqaməti üzrə nümayəndəsi Füzuli Kərimov bildirib.
Onun sözlərinə görə, gələcəkdə xarici bazarlara dəmir filizinin nəqli həcmlərinin artacağı istisna edilmir.
Filizin daşınmasının təşkili üçün Gəncə-Daşkəsən dəmiryolunun yenidən qurulması üzrə işlər aparılıb. Kərimov bildirib ki, eləcə də 220 xüsusi vaqon və iki elektrovoz ayrılıb.
O, həmçinin qeyd edib ki, yaxın vaxtlarda Daşkəsəndən dəmir filizi yerli zavodlara nəql olunacaq.
Metallurgiya zavodunun tikintisi başa çatdıqdan sonra QSC bu zavoda filizin nəqlini təmin edəcək.
Kərimovun dediyi kimi, dövlət proqramı çərçivəsində gələn ildən qərb istiqamətində dəmiryolun 317 kilometr hissəsinin yenidən qurulması üzrə işlərin aparılacağı planlaşdırılır.
