Azərbaycan, Bakı, 28 mart /Trend, müxbir N.İsmayılova/
Azərbaycanda məhkəmə-hüquq sisteminin modernləşdirilməsi layihəsinin reallaşdırılması gedişinin icmalının aparılması üçün martın 28-dən Dünya Bankının (DB) missiyasının Bakıya səfəri başlayır. Missiyaya layihənin rəhbəri Klaus Dekker rəhbərlik edir. Bu barədə bazar ertəsi DB-nin Bakı nümayəndəliyindən məlumat verilib.
Missiya aprelin 2-dək Bakıda olacaq. Səfər çərçivəsində Azərbaycanda məhkəmə-hüquq sisteminin modernləşdirilməsi üzrə ikinci layihənin hazırlanması üzrə danışıqların yekunları müzakirə olunacaq. BU DB-nin əlavə maliyyələşmə təqdim etməsi çərçivəsində mövcud layihənin davamı olacaq. DB-nin proqnozlarına görə, layihə üçün əlavə maliyyələşmə 30-32 milyon dollar səviyyəsində gözlənilir.
"Layihənin ikinci mərhələsinin hazırlanması aprelin sonlarında başa çatacaq, onun bu il iyulun sonlarında isə DB Direktorlar Şurası tərəfindən təsdiqlənməsi gözlənilir", - nümayəndəlikdən bildirilib.
Layihənin ümumi dəyəri 35,6 milyon dollar təşkil edir. Bankın kredit payı 21,6 milyon dollardır. Yaponiyanın xüsusi fond hesabından 3 milyon dollar qrant ayrılıb, Azərbaycan hökumətinin iştirak payı 11 milyon dollardır. Layihə beş ilə hesablanıb.
DB-nin krediti Beynəlxalq İnkişaf Assosiasiyası xətti ilə standart şərtlərlə 35 il müddətinə 10 illik güzəştli dövr olmaqla və illik 0,75 faizlə verilib. 10 illik güzəştli müddət bitdikdə, kreditin 1,25 faizlə ödənilməsinə başlanılacaq. 2026-cı ildən 2041-ci ilədək 2,5 faizlə ödəniləcək.
Bu gün layihə üzrə Ali Məhkəmənin, Konstitusiya Məhkəməsinin, Ədliyyə Nazirliyinin qeydiyyat orqanlarının, eləcə də Məhkəmə-Hüquq Şursının binalarının kompüterləşdirilməsi və texniki təchizatı üzrə işlər aparılır.
DB-nin Direktorlar Şurası 2006-cı il iyunun 29-da Azərbaycanın məhkəmə-ədliyyə sistemi üçün krediti təsdiq edib.
Layihə 4 komponentdən ibarətdir:
- idarəetmənin kompüter sisteminin, məlumat şəbəkəsi və treyninqin yaradılması ilə hüquq institutlarının idarəetmə bacarığının gücləndirilməsi;
- məhkəmənin imkanlarının artırılması - məhkəmə binalarının tikintisi və təmiri, idarəetmə sistemində müasir texnologiya və kompüterləşmənin tətbiqi;
- hakimlərin peşəkarlığının treyninqlər və mütəmadi təlimlər vasitəsilə gücləndirilməsi;
- vətəndaşların notariatda qeydiyyatı barədə olan məlumata daxil olmağa imkan verən mülki məlumatlandırma proqramları.