Azərbaycan, Bakı, 29 mart /Trend, müxbir Ü.İsmayılova/
Azərbaycanın yeganə təkrarsığorta şirkəti "AzRe Təkrarsığorta" ASC-nin aktivləri 2010-cu ilin fəaliyyət yekunları üzrə ilin əvvəlindəki 22,495 milyon manata qarşı 33,098 milyon manat təşkil edib. Bu barədə çərşənbə axşamı şirkətin rəsmi mətbuatda dərc edilmiş balans hesabatında deyilir.
Şirkətin maliyyə hesabatlılığının auditi "Euro Audit" MMC tərəfindən aparılıb.
Bu müddət ərzində şirkətin uzunmüddətli aktivləri 3,194 milyon manat, qısamüddətli aktivləri isə 29,903 milyon manat təşkil edib.
Ötən ilin sonunda şirkətin depozit hesabları 24,876 milyon manat təşkil edib. İlin əvvəlində bu göstərici 10,671 min manat olub.
İlin sonunda şirkətin məcmu kapitalı 2009-cu ildəki 10,865 milyon manata qarşı 25,82 milyon manat təşkil edib. "AzRe Təkrarsığorta" ASC-nin nizamnamə kapitalı 2010-cu ildə 10,86 milyon manatdan 25,8 milyon manatadək artıb. Şirkətin xalis mənfəəti 9,8 dəfə artaraq 15,619 milyon manat olub. Bölünməmiş mənfəəti dörd dəfə artaraq 20,798 milyon manata çatıb.
Şirkətin uzunmüddətli öhdəlikləri 7,271 milyon manat, qısamüddətli öhdəlikləri 6,19 min manat, kapital və öhdəlikləri ümumilikdə, 33,098 milyon manat təşkil edib.
Ötən ilin yekunları üzrə şirkətin gəlirləri 29,747 milyon manat, o cümlədən, təkrarsığorta üzrə 21,921 milyon manat təşkil edib. Şirkətin investisiya qoyuluşları üzrə gəlirləri 2,498 milyon manat, sığorta ödənişlərində təkrar sığortanın payı 1,406 milyon manat, təkrarsığorta müqavilələri üzrə komisyon haqlar 150, 412 milyon manat olub.
2010-cu ildə şirkətin xərcləri 14,782 milyon manat, o cümlədən sığorta ödənişləri üzrə 9,118 milyon manat, təkrar sığorta ödənişləri üzrə 1,008 milyon manat təşkil edib.
2010-cu ildə şirkət 205,592 min manat məbəlğində mənfəət vergisi, ƏDV - 33,975 min manat, ödəniş mənbəyindən vergi (4 faiz) 50,779 min manat, sosial sığorta və təminat vergisi 47,446 min manat, icbari ödənişlər (0,3 faiz) - 75,86 min manat, əmlak vergisi - 163,75 min manat, digər vergilər üzrə - 60 min manat ödəyib.
Azərbaycanın birinci təkrar sığorta şirkəti "AzRe Təkrarsığorta" 7 noyabr 2007-ci ildə təkrar sığorta fəaliyyəti həyata keçirmək üçün Azərbaycanın Maliyyə Nazirliyindən lisenziya alıb. Şirkətin səhmdarları altı fiziki şəxsdir. Şirkət yerli və regional sığorta, təkrar sığorta şirkətləri və təkrarsığota vasitəçiləri ilə əmlak, tikinti-quraşdırma riskləri, su, hava və avtomobil nəqliyyat vasitələri, yüklər, bədbəxt hadisələr, məsuliyyət və maliyyə risklərinin sığortası üzrə xidmət göstərir.
Martın 29-na rəsmi məzənnə 0,7929 AZN/USD təşkil edir