Azərbaycan, Bakı, 6 aprel /Trend, müxbir N.İsmayılova/
Azərbaycanın özəl sektorunun ortatəcili və uzunmüddətli artımı stabil makroiqtisadi mühitdən və normativ-hüquqi bazanın yaxşılaşdırılmasından asılı olacaq. Trend-in məlumatına görə, bu barədə Asiya İnkişaf Bankının (AİB) "Asiyanın 2010-ci il üçün inkişaf perspektivləri" hesabatında deyilir.
"Qeyri-neft sektorunun inkişafı və iqtisadiyyatın şaxələndirilməsi Azərbaycan hökuməti üçün uzunmüddətli prioritetdir. Kənd təsərrüfatı, telekommunikasiya, turizm kimi sahələr artım potensialına malikdir", - hesabatda qeyd olunub.
Kənd təsərrüfatı xüsusi əhəmiyyətə malikdir, belə ki, ölkə əhalisinin 40 faizi kənd rayonlarında yaşayır. Hökumət proqramlarının sektorun dəstəklənməsinə yönəldildiyinə baxmayaraq, kənd əhalisi xeyli dərəcədə pul köçürmələrindən asılıdır.
Növbəti addımlara suvarma sisteminin və digər infrastrukturların bərpası və qorunması daxildir. Fiziki infrastrukturun, xüsusilə də avtomobil və dəmir yollarının, eləcə də energetika sahəsinin yaxşılaşdırılması qeyri-neft sektoru üçün mühüm əhəmiyyətə malikdir.
AİB Azərbaycana ticarət prosedurlarının sadələşdirilməsini tövsiyə edir ki, uğurlu idxalçı olsun. Bundan başqa, ayrı-ayrı sahələr və ya əməliyyatlar üçün lazımlı olan icazələr proseduru və sistemi sadələşdirilməli olduğu halda, idarəetmə və şəffaflıq yaxşılaşdırılmalıdır ki, iri dövlət investisiya proqramlarının həyata keçirilməsindən maksimal dərəcədə potensial fayda əldə edilsin.
