Azərbaycan, Bakı, 14 aprel /Trend, müxbir N.İsmayılova/
Azərbaycan bankı "Texnika Bank"ın 2011-ci il üçün prioriteti plastik kartlar üzrə layihələrin həyata keçirilməsi olacaq. Onların sayının il ərzində 200 faiz artırılması planlaşdırılır. Bu barədə bankın idarə heyətinin sədri Samir Hüseynov deyib.
"Son yeddi il ərzində bank tərəfindən 50 min plastik kart buraxılıb, bu il biz onların sayını 100 min ədəd artırmağı və 150 minə çatdırmağı planlaşdırırıq", - Hüseynov qeyd edib.
Onun sözlərinə görə, 2011-ci ildə kart biznesinin inkişafı bank üçün prioritet olacaq və artıq VISA Inc. və MasterCard ödəniş sistemləri ilə danışıqlar aparılır.
"Bank artıq kartlar üzrə tarifləri xeyli azaldıb, lakin biz hesab edirik ki, yerli banklarda indiki tariflər hələ də çox yüksəkdir və banklar kart dövriyyəsinin artırılması məqsədilə onların qiymətinin azaldılması üzrə işi davam etdirməlidirlər. Bunu multifunksional kartların buraxılması ilə stimullaşdırmaq olar", - o bildirib.
Hüseynovun sözlərinə görə, bank kartlarını təkcə ödəniş sistemi kimi deyil, həm də ictimai nəqliyyatda ödəniş üçün istifadə etməyə imkan verəcək "PayPass с MasterCard" layihəsini həyata keçirməyə başlayıb. Bu texnologiyanın ənənəvi texnologiyadan fərqi ondadır ki, kartı terminala salmaq, PİN kodu daxil etmək və çek yazmaq lazım deyil. Ödənişi etmək üçün "PayPass" sahibinin terminalın əlaqə meydançasına toxunması kifayətdir. Ödəniş dərhal baş verir. Hüseynovun sözlərinə görə, bank layihənin altı ay ərzində başa çatdırılmasını planlaşdırır.
"Texkart" prosessinq mərkəzi Azərbaycan bankı "Texnika Bank" tərəfindən 2007-ci ildə yaradılıb. Şirkət ilkin olaraq yalnız "Texnika Bank"a xidmət göstərir, lakin gələcəkdə onun başqa banklara da göstərilməsi nəzərdə tutulub. Şirkətin nizamnamə kapitalı bir milyon manatdır.
"Texnikabank" bank bazarında 1993-cü ildən fəaliyyət göstərir və 2007-ci ilədək 100 faiz Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.