Azərbaycan, Bakı, 27 aprel /Trend, müxbir A.Axundov/
Bu yaxınlarda ərəb ölkələrində baş vermiş iğtişaşlarla əlaqədar Türkiyədə turizm xidmətlərinin qiymətinin artması, eləcə də "Azərbaycan Hava Yolları" QSC-nin bu ölkə istiqamətində mövsümi reyslərin qiymətini artırması Azərbaycanda daxili turizm bazarının inkişafında müsbət rol oynayacaq. Trend-in məlumatına görə, bu barədə çərşənbə günü jurnalistlərə Azərbaycan Mədəniyyət və Turizm Nazirliyinin Turizm departamentinin rəhbəri Aydın İsmiyev deyib.
"Bu il daxili turizmin payı artacaq", - İsmiyev bildirib.
AZAL-ın Türkiyə istiqamətində reyslərin qiymətini artırması bu ölkədə yanacağın qiymətinin, eləcə də gömrük yığımlarının artması ilə əlaqədardır. KİV-in məlumatına görə, Türkiyədə turizm xidmətlərinin qiyməti təxminən 15 faiz artıb.
Onun sözlərinə görə, 2010-cu ilin yayında 60-70 min Azərbaycan turisti xarici ölkələrdə səfərdə olub, ölkə daxilində isə 200 min nəfər istirahət edib.
"Bu, mehmanxana və turizm şirkətlərindən alınan məlumatlar əsasında tərtib edilən rəsmi statistikadır", - İsmiyev vurğulayıb.
Onun sözlərinə görə, ölkə regionlarındakı turizm obyektləri turistlərin sayının artmasına hazırdır.
"Lakin bu halda yeni obyektlər də tikilə bilər", - İsmiyev vurğulayıb.
"Azərbaycan Hava Yolları" QSC Bakı-Antalya və Bakı-Bodrum marşrutu üzrə birbaşa mövsümi reysləri bərpa edib. Bu barədə Trend-ə bazar ertəsi QSC-dən məlumat veriblər.
Məlumata əsasən, Bakı-Antalya reysi mayın 27-dən etibarən həyata keçiriləcək. Təyyarə Bakıdan cümə və şənbə günləri yerli vaxtla saat 11:10-da qalxacaq. Reyslər sentyabrın 30-dək yerinə yetiriləcək. Hər iki istiqamət üzrə uçuşun qiyməti 535 manatdır.
İyunun 11-dən etibarən "Azərbaycan Hava Yolları" QSC Bakı-Bodrum aviareyslərini həyata keçirməyə başlayacaq. Təyyarə Bakıdan şənbə günü yerli vaxtla saat 11:50-da qalxacaq. Reyslər sentyabrın 10-dək yerinə yetiriləcək. Hər iki istiqamət üzrə uçuşun qiyməti 530 manatdır.
Aprelin 27-nə olan rəsmi məzənnə 0,7914 AZN/USD təşkil edir.
