Azərbaycan, Bakı, 29 aprel /Trend, müxbir A.Axundov/
Azərbaycan Dövlət Statistika Komitəsi və Mədəniyyət və Turizm Nazirliyinin birgə araşdırmalarına əsasən, ölkədə 477 mehmanxana və mehmanxana tipli obyekt fəaliyyət göstərir. Bunlardan 307-si lisenziya alıb. Bu barədə "Əmlak Bazarı İştirakçıları" İctimai Birliyinin nəşr etdirdiyi "Əmlak bazarı" jurnalına müsahibəsində nazirliyin tədqiqat işləri, statistika və lisenziyalaşıdrma üzrə sektorunun rəhbəri Rəhman Oruclu deyib.
Onun sözlərinə görə, Azərbaycanda turizm fəaliyyətinin həyata keçirilməsi üçün müvafiq lisenziya almaq lazımdır və son vaxtlar mehmanxana və mehmanxana tipli obyektlərin lisenziyalaşdırılmaya cəlb edilməsi faizi kəskin şəkildə artıb.
"Obyektlərin lisenziyalaşdırılması üçün Mədəniyyət və Turizm Nazirliyinə müəyyən sənədlər təqdim edilməlidir. Təəssüf ki, bəzi mehmanxana və mehmanxana tipli obyektlərin sahibləri tikinti işləri aparan zaman səhvə yol verirlər. Nəticədə obyektin tikilməsinə baxmayaraq, bu səhvlər səbəbindən onlar müəyyən sənədləri ala bilmirlər. Təbii ki, qanunvericiliyə əsasən, onlardan lazımi sənədlər almadan lisenziya verə bilmərik", - Oruclu qeyd edib.
Onun sözlərinə görə, bundan sonra nazirlik bu məsələdə ciddi tədbirlər görəcək.
"Rəhbərliyin prinsipial mövqeyi ondan ibarətdir ki, qanunsuz fəaliyyət göstərən mehmanxanaların işi dayandırılmalıdır. Belə mehmanxanaların çoxu Bakıdan kənarda yerləşir", - Oruclu vurğulayıb.
Mehmanxana və mehmanxana tipli obyektlərin fəaliyyətinə lisenziya 5 il müddətinə 1500 manat dövlət rüsumunu ödəmək şərtilə verilir. Turizm fəaliyyəti üçün də lisenziya 5 il müddətinə 5500 manat dövlət rüsumu ödənilməklə verilir.
Oruclunun sözlərinə görə, bəzi sahibkarlar öz mehmanxanalarının müəyyən ulduzlu kateqoriyaya aid olması barədə əsassız fikirlər irəli sürə bilərlər.
"Lakin mövcud qanunvericiliyə əsasən, mehmanxanaya kateqoriyanı yalnız aidiyyəti dövlət qurumlarının nümayəndələrindən ibarət xüsusi ekpert qrupunun və attestasiya komissiyasının rəyini aldıqdan sonra vermək olar", - Oruclu bildirib.
Onun sözlərinə görə, hazırda 15 mehmanxana və mehmanxana tipli obyekt beşulduzlu, 37-si dördulduzlu, 21-i üçulduzlu, 3-ü ikiulduzlu, 1 isə birulduzludur.
"Mehmanxanalara kateqoriya 3 il müddətinə verilir və bu müddət ərzində dövlər rüsumu tutulmur. Sahibkar sadəcə olaraq kateqoriyanın alınmasına görə müraciət edir, ekspert qrupu baxış keçirir və hər şey qaydasında olanda, obyekt ulduzu alır. Bu 3 il ərzində nazirliyin obyektə verilən kateqoriyanın uyğunluğunu yoxlamaq hüququ yoxdur", - Oruclu qeyd edib.
Aprelin 29-na olan rəsmi məzənnə 0,7914 AZN/USD təşkil edir.