Azərbaycan, Bakı, 2 may /Trend, müxbir A.Axundov/
Azərbaycanın sığorta şirkəti "Meqa Sığorta" cari ilin ikinci rübündə təqdim ediləcək bir sıra yeni məhsullar hazırlayır. Bu barədə Trend-ə bazar ertəsi şirkətin PR meneceri Elnur Eyvazov deyib.
"Hazırda şirkətin yığımlarının əsas hissəsi avtomobillər, əmlak, yük və bədbəxt hadisələrdən sığortanın payına düşür", - Eyvazov bildirib.
Onun sözlərinə görə, indi şirkət tibbi sığorta üzrə portfelinin artırılması ilə bağlı iş aparır.
"Bununla əlaqədar tibbi müəssisələrlə, əsas etibarilə özəl kilinikalarla müştərilər üçün daha rahat olan birgə məhsulların yaradılması üzrə danışıqlar aparılır. Bu məhsulların tətbiqi nəticəsində sənəd dövriyyəsi azaldılacaq, onları hətta onlayn rejimdə almaq da mümkün olacaq", - Eyvazov qeyd edib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, birinci rübdə şirkət sıfır ödənişlə 36,2 min manat yığıb.
"Nizamnamə kapitalının səviyyəsi şirkətə inamı formalaşdıran mühüm amillərdən biridir. Apreldə şirkətin nizamnamə kapitalı 5 milyon manata çatdırılıb, bu isə şirkətin stabilliyindən xəbər verir", - Eyvazov vurğulayıb.
Sığorta şirkətlərinin kapitallaşdırma qrafikinə əsasən, 2013-cü ilədək sığortaçılar üçün minimal səviyyə 5 milyon manat, təkrar sığortaçılar üçün 10 milyon manat müəyyənləşdirilib. Bu halda 2011-ci il yanvarın 1-nə olan vəziyyətə görə, sığortaçıların kapitalına olan minimal tələb 3 milyon manatdır.
"Meqa Sığorta" şirkəti yeni brendlə 2010-cu il oktyabrın 1-dən fəaliyyətə başlayıb və sığorta xidmətlərinin 29 növünün, o cümlədən 4 icbari növünün göstərilməsinə lisenziyası var.
Mayın 2-nə olan rəsmi məzənnə 0,7916 AZN/USD təşkil edir.
