Azərbaycan, Bakı, 3 may /Trend, müxbir A.Axundov/
Çərşənbə axşamı Bakıda Azərbaycan və BƏƏ gömrük orqanları arasında gömrük sahəsində qarşılıqlı anlaşma və əməkdaşlıq sahəsində saziş imzalanıb.
Trend-in məlumatına görə, sazişi Azərbaycan Dövlət Gömrük Komitəsinin (DGK) rəhbəri Aydın Əliyev və BƏƏ-nin Federal Gömrük İdarəsinin baş direktoru Xalid Əli əl-Bostani imzalayıb.
Sənədin imzalanması Azərbaycanla BƏƏ arasında iqtisadi, ticarət və texniki əməkdaşlıq üzrə hökumətlərarası komissiyanın üçüncü iclası çərçivəsində baş tutub.
Bir qədər əvvəl Əliyevin dediyi kimi, Azərbaycan və BƏƏ-nin əməkdaşlıq etmələri üçün bir çox sahələr var.
"Qarşılıqlı maraqların əsas sahəsi gömrük qiymətləndirməsi məsələsidir. Biz ildən-ilə malların qiymətləndirilməsi prinsiplərini təkmilləşdiririk. BƏƏ-dən Azərbayacana gətirilən bir çox mallar üçüncü ölkədə istehsal olunur", - Əliyev bildirib.
Onun sözlərinə görə, qiymətli metalların qaçaqmalçılığı halları müşahidə olunur.
"Son vaxtlar BƏƏ-dən bahalı mobil telefonların gətirilməsi populyarlaşıb. Ona görə də bizim qarşılıqlı əməkdaşlıq etməyimiz üçün bir çox ümumi sahələr var", - Əliyev deyib.