Azərbaycan, Bakı, 4 may /Trend, müxbir A.Axundov/
2010-cu il fəaliyyətinin yekunları üzrə Azərbaycanın sığorta şirkəti AXA MBASK-ın aktivləri ilin əvvəlindəki 18,108 milyon manata nisbətdə 1,32 faiz artaraq 18,348 milyon manat təşkil edib. Trend-in məlumatına görə, bu barədə şirkətin rəsmi mətbuatda dərc olunmuş balans hesabatında deyilir.
2010-cu ilin sonunda şirkətin uzunmüddətli aktivləri il ərzində 4 faiz artaraq 4,863 milyon manat, qısamüddətli aktivləri isə illik 0,15 faiz artımla 13,485 milyon manat təşkil edib.
Ötən il şirkətin depozit hesabları 9,369 milyon manat, hesablaşma hesabları 0,838 milyon manat manat olub.
2010-cu ildə AXA MBASK ASC-nin ödənilmiş nizamnamə kapitalı il ərzində 2,87 dəfə artaraq 5,73 milyon manata çatıb. Ötən ilin yekunları üzrə şirkətin xalis gəliri 1,393 milyon manat təşkil edib. Bütün xalis gəlir nizamnamə kapitalının artırılmasına yönəlib.
Ötən il şirkətin məcmu kapitalı 2009-cu illə müqayisədə 34,72 faiz artaraq 8,998 milyon manat olub.
Şirkətin məcmu öhdəlikləri 18,19 faiz azalaraq 9,35 milyon manat, ümumilikdə kapital və öhdəlikləri 1,32 faiz artaraq 18,348 milyon manat təşkil edib.
Ötən ilin yekunları üzrə şirkətin gəlirləri 11,144 milyon manat, o cümlədən sığorta üzrə 7,994 milyon manat, təkrar sığorta üzrə 383,491 min manat, investisiya gəlirləri üzrə 1,153 milyon manat olub, sığorta ödənişlərində təkrar sığortaçıların payı 257,763 min təşkil edib.
2010-cu il ərzində şirkətin xərcləri 9,75 milyon manat, o cümlədən sığorta ödənişləri 3,529 milyon manat, təkrar sığorta ödənişləri 630,77 min manat, işlərin aparılması üçün xərcləri 4,008 milyon manat olub.
Şirkətin maliyyə hesabatları və vergi bəyannamələri üzrə auditor rəyi auditor şirkəti "Kaspian Konsaltinq" tərəfindən tərtib edilib.
Birinci rübdə şirkətin sığorta haqları 0,635 milyon manat ödənişlə 2,636 milyon manat təşkil edib.
Ötən ilin oktyabrında MBASK əsas səhmdarı dəyişib. Şirkətin nəzarət paketini (51 faiz) AXA Group (Fransa) öz törəmə şirkəti AXA Sequros Generales, S.A, De Sequros Y Reasequros (İspaniya) vasitəsilə alıb.
Mayın 4-nə olan rəsmi məzənnə 0,7912 AZN/USD təşkil edir.