Azərbaycan, Bakı, 21 may /Trend, müxbir N.İsmayılova/
Azərbaycanın Risk Peşəkarları Assosiasiyasının (ARPA) üzvlərinin sayı ilin əvvəlindən üç təşkilat artıb. Bu barədə şənbə günü Trend-ə assosiasiyanın rəhbəri Rüfət Mahmud məlumat verib.
"İlin əvvəlindən iki bank - Texnika Bank və AF Bank, eləcə də "İnvest Kredit" Bank Olmayan Kredit Təşkilatı ARPA-ya üzv olub", - Mahmud deyib.
Onun sözlərinə görə, "İnvest Kredit" assosiasiyanın tərkibinə daxil olan ilk BOKT-dir. Həmçinin, ilin əvvəlindən ARPA-nın fərdi üzvlərinin sayı artıb.
Assosiasiyanın üzvü olan banklara ARPA-nın AMB, beynəlxalq institutlar, auditor şirkətləri və kommersiya banklarının ekspertlərinin iştirakı ilə təşkil etdiyi "dəyirmi masa" və seminarlarda iştirak etmək imkanı verilir. Bununla yanaşı, assosiasiya üzvlərinə ARPA-nın keçirdiyi treninq-proqramlarda iştirak etmək üçün endirimlər təqdim edilir. Bu gün ARPA üzvlərinin sayı 20-ni ötür.
ARPA-nın yaradılmasında məqsəd ölkənin maliyyə sektorunda risklərin azaldılmasına kömək etməkdir. Assosiasiya ölkənin Mərkəzi Bankı, Risk-Menecment Peşəkarları Qlobal Assosiasiyası (GARP) və IFC ilə əməkdaşlıq edir.