Azərbaycan, Bakı, 25 may /Trend, müxbir İ.İsabalayeva/
Azərbaycan hökuməti Ümumdünya Ticarət Təşkilatının (ÜTT) işçi qrupu ilə növbəti görüşün (çoxtərəfli danışıqların IX mərhələsi) oktyabr-noyabr aylarında keçiriləcəyini gözləyir. Bu barədə çərşənbə günü danışıqlar qrupunun rəhbəri, xarici işlər nazirinin müavini Mahmud Məmmədquliyev bildirib. Bundan əvvəl danışıqların bu mərhələsi 2010-cu ilin dekabrına planlaşdırılmışdı.
"Güman edirəm ki, iyulda ÜTT üzvü olan ölkələrlə ikitərəfli danışıqlar, ilin ikinci yarısında isə çoxtərəfli danışıqlar keçiriləcək", - Məmmədquliyev bildirib.
Sonuncu görüş [çoxtərəfli danışıqların VIII mərhələsi] 2010-cu ilin oktyabrın 18-də keçirilib. Oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nın digər üzvləri ilə ticarət və xidmət məsələləri üzrə ikitərəfli danışıqlar aparılıb.
"Azərbaycanın ÜTT-yə üzv qəbul edilməsi üçün bir çox həll olunmamış məsələlər qalır. Eləcə də biz mal və xidmətlər üzrə razılaşmaya nail olmalıyıq", - Məmmədquliyev bildirib.
Bunlarla yanaşı, o, milli hüquqi bazanın ÜTT-nin tələblərinə uyğunlaşdırılmasının, qüvvədə olan ticarət rejiminin təkmilləşdirilməsinin vacibliyini qeyd edib. Məmmədquliyev deyib ki, təxminən 40-50 qanunvericilik aktı təşkilatın tələblərinə uyğunlaşdırılmalıdır ki, onlardan təxminən 30 sənəd artıq vahid şəklə salınıb və gələn il bu istiqamətdə işlər davam etdiriləcək.
Hazırda Azərbaycan 12 ölkə ilə danışıqlar mərhələsindədir, lakin bu siyahının genişlənəcəyi istisna edilmir. Çünki belə bir təcrübə artıq tətbiq olunub.
"ÜTT-yə daxilolma prosesi uzun prosesdir, bunu 17 il ərzində danışıqlar aparan Rusiyanın təcrübəsi sübut edir, Azərbaycan isə danışıqlara 2004-cü ildən başlayıb", - Məmmədquliyev deyib.
Azərbaycan danışıqlara 2004-cü ildən başlayıb. Bu gün ölkə ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir. 2009-cu ildə bu siyahıya İsveçrə də qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalanmaya razılıq verib.
Ötən il ÜTT katibliyi Azərbaycan üzrə işçi qrupun tərkibini genişləndirib və oraya daha dörd ölkəni - Ukrayna, Braziliya, Ekvador və İsveçrəni daxil edib. Bunun nəticəsində işçi qrupun üzvlərinin ümumi sayı Aİ-nin 27 ölkəsi də daxil olmaqla 32-yə çatıb.
ÜTT yanında Azərbaycan üzrə işçi qrup 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.