Azərbaycan, Bakı, 3 iyun /Trend, müxbir A.Axundov/
Azərbaycan Sığortaçılar Assosiasiyasının icraçı direktoru Azər Əliyev "Sığortanın icbari növləri haqqında" qanun layihəsi çərçivəsində Azərbaycanda yaradılması nəzərdə tutulan Nəqliyyat Vasitələrinin İcbari Sığorta Bürosuna üzvlük haqlarının məbləğinin iqtisadi cəhətdən əsaslandırılmış olacağına və bu günün tələblərinə cavab verəcəyinə inamını ifadə edib.
"Bu gün büronun üzvlük haqlarının konkret məbləği barədə danışmaq hələ tezdir. Hesab etmirəm ki, üzvlük haqlarının məbləği özbaşına müəyyən ediləcək. Hər halda biz sığorta biznesində çalışırıq, bu isə çoxillik statistik məlumatların təhlilinə əsaslanan mürəkkəb riyazi hesablamalar biznesidir. Ona görə də konkret rəqəmlər meydana çıxanda həmin rəqəmlərin iqtisadi baxımdan əsaslandırılmış olduğuna və bu günün tələblərinə cavab verəcəyinə əmin olursan", - Əliyev bildirib.
Parlamentin İqtisadi siyasət komitəsinin sədri Ziyad Səmədzadənin dünən Trend-ə dediyi kimi, sığorta şirkətləri Nəqliyyat Vasitələrinin İcbari Sığorta Bürosuna üzvlük haqlarını azaltmağı təklif edirlər.
Üçüncü oxunuşu iyunun sonunda keçiriləcək qanun layihəsinə əsasən, büronun üzvləri nəqliyyat vasitələri sahiblərinin mülki məsuliyyətinin icbari sığortası üzrə xidmətlərin göstərilməsi üçün lisenziyaya malik sığorta şirkətləri olacaq. Sığorta şirkətləri - büro iştirakçıları avtomobil nəqliyyatı vasitələri sahiblərinin icbari sığortası üzrə müqavilələr çərçivəsində daxil olan sığorta haqlarının 3 faizi məbləğində təqvimi ödənişlər etməli olacaqlar. Təqvimi ödənişlər hər rübdə hesabat dövrü başa çatdıqdan 15 gün sonra büronun hesabına köçürülməlidir.
Sığorta halları üzrə kompensasiyaların ödənilməsi üçün ehtiyat mənbələr sırasında büroya təminat depoziti də ödənilməlidir. Büronun üzvü olmaq istəyən sığorta şirkətləri birdəfəlik üzvlük haqqı - təminat depoziti ödəməlidirlər. Onun məbləği Dövlət Sığorta Nəzarəti Xidməti tərəfindən müəyyən edilir.
"İndi fondun məbləği müzakirə edilir, sığorta şirkətlərinin çoxu istəyir ki, üzvlük haqları az olsun", - Səmədzadə bildirib.
Qanun layihəsi avtomobil nəqliyyatı vasitələrindən asılı olaraq sığorta tarifinin müəyyənləşdirilməsi zamanı şaxələndirilmiş yanaşmanı nəzərdə tutur. Əmlak üzrə avtomobil nəqliyyatı vasitələri sahiblərinin mülki məsuliyyətinin ödəniş məbləği 5 min manat (hazırda 1 min manat), sağlamlıq üzrə 50 min manat (hazırda 5 min manat) təşkil edəcək. Hazırda fəaliyyətin bu növü 1996-cı ildə qəbul edilən qanunla tənzimlənir.
İyunun 3- nə rəsmi məzənnə 0, 78 93 AZN/USD təşkil edir.