Azərbaycan, Bakı, 21 iyun /Trend, müxbir N.İsmayılova/
Azərbaycanın "Turan Lizinq" şirkəti ilin sonunadək fəaliyyət strategiyasını hazırlayacaq. Bu barədə "Turan Bank"ın Müşahidə Şurasının sədri Fuad Musayev çərşənbə axşamı bildirib. "Turan Bank" "Turan Lizinq"in 100 faizlik səhmdarıdır.
"Bu ildən başlayaraq bank lizinq şirkətinin inkişafına yönəlmiş işə başlayacaq, fəaliyyət strategiyası hazırlanacaq və ölkədə həyata keçirilən dövlət proqramları nəzərə alınacaq, maliyyələşdirmənin və gətirilən texnika növlərinin prioritet sahələri müəyyən ediləcək", - Musayev deyib.
Onun sözlərinə görə, şirkət bankdan asılı olmayan hüquqi şəxs kimi fəaliyyət göstərəcək. İdarəetmə forması MMC-dən ASC-yə dəyişdiriləcək.
"Biz həmçinin şirkətə korporativ idarəetmənin müasir standartlarını tətbiq etmək istəyirik və bu istiqamətdə BMK ilə əməkdaşlığı davam etdirməyi planlaşdırırıq", - o deyib.
Bu gün "TuranLizinq"in lizinq portfeli 0,5 milyon manat, nizamnamə kapitalı 100 min manat təşkil edir.
