Azərbaycan, Bakı, 11 iyul /Trend, müxbir A.Axundov/
Azərbaycan ilə ÇXR-in Sinszyan-Uyğur Muxtar Respublikası (SUMR) arasında ticari-iqtisadi əməkdaşlıq üzrə işçi qrupunun ikinci iclası 2013-cü ilin birinci yarısında Urumçi şəhərində keçiriləcək. Trend-in məlumatına görə, bu barədə birinci iclasın yekunları üzrə qəbul edilən protokolun mətnində deyilir.
İşçi qrupunun birinci iclası iyulun 11-də Bakıda baş tutub.
"İclasın keçirilməsinin konkret tarixi diplomatik kanallar vasitəsilə razılaşdırılacaq", - protokolun mətnində deyilir.
İşçi qrupunun birinci iclasının gedişində hər iki tərəf SUMR ilə Azərbaycan arasında ticari-iqtisadi münaasibətlərin cari vəziyyətini nəzərdən keçirib və ümumiləşdiriblər, bu münasibətlərin vəziyyətini müsbət qiymətləndiriblər.
Tərəflər ikitərəfli ticarətin inkişafına yardım edən ticari-iqtisadi forumların müntəzəm təşkili və keçirilməsinin vacibliyini qeyd ediblər.
Tərəflər ətraflı danışıqlar aparıblar və ticarət, investisiyalar, energetika, kənd təsərrüfatı kooperasiyası, nəqliyyat, gömrük, maliyyə, mədəni mübadilə, turizm, səhiyyə kimi sahələrdə, habelə regional əməkdaşlığın genişləndirilməsində əlaqələrin qurulmasına yardım etməklə bağlı birgə razılıq əldə ediblər.
