Azərbaycan, Bakı, 11 iyul /Trend, müxbir A.Axundov/
Azərbaycanın həyat sığortası şirkəti "Paşa Həyat" ilin sonunadək öz portfelində könüllü sığortanın payını 30 faizədək çatdırmağı planlaşdırır. Bu barədə bazar ertəsi Trend-ə şirkətin idarə heyətinin sədri Niyaz İsmayılov məlumat verib.
"Biz artıq sığortanın könüllü növləri - yığım həyat sığortası və banklardan kredit götürən şəxslərin həyatının sığortası üzrə işlərə başlamışıq. Yığım həyat sığortası xidmətlərini biz artıq bu aydan tətbiq etmişik", - İsmayılov deyib.
Onun sözlərinə görə, ilin sonunadək şirkət ümumilkdə 8-9 milyon manat həcmində mükafat toplamağı planlaşdırır.
Maliyyə Nazirliyi yanında Dövlət Sığorta Nəzarəti Xidmətinin məlumatına görə, yanvar-may aylarında şirkət 6,12 milyon manat həcmində mükafat toplayıb.
"Paşa Həyat" ölkədəki həyat sığortası şirkətləri arasında ("Atəşgah Həyat" və "Qala Həyat") ən kapitallaşmış şirkətdir. SŞ 2011-ci ilin fevralında yeddi milyonluq kapitalla bazara daxil olub. Yeni sirkətin yeganə səhmdarı və səhmlərinin sahibi "Paşa Holdinq"dir.
İyulun 11-nə olan rəsmi məzənnə 0,7867 AZN/USD təşkil edir.
