Azərbaycan, Bakı, 14 iyul /Trend, müxbir A.Axundov/
Azərbaycanın tibbi sığorta sahəsində lider olan "A-Group" sığorta şirkəti 2012-ci ildə nizamnamə kapitalını dörd milyon manatadək çatdırmağı planlaşdırır. Bu barədə cümə axşamı Trend-ə şirkətin idarə heyətinin sədri Anar Bayramov məlumat verib.
"Biz nizamnamə kapitalını dörd milyon manatadək çatdırmağı planlaşdırırıq ki, bu da Maliyyə Nazirliyinin tələblərinə uyğun olacaq", - Bayramov bildirib.
Onun sözlərinə görə, 2011-ci ilin fəaliyyət yekunları üzrə əldə olunacaq bütün gəlir kapitallaşmaya yönəldiləcək.
"Bu il biz bir milyon manatdan artıq məbləğdə mənfəət əldə edəcəyimizə ümid edirik", - Bayramov deyib.
Maliyyə Nazirliyinin sığortaçıların kapitalına miminum tələbləri 2011-ci il yanvarın 1-dən üç milyon manat, gələn ilin əvvəlindən isə dörd milyon manat təşkil edəcək.
1995-ci ildə yaradılan "A-Group" şirkəti sığortanın 3 icbari və 14 könüllü növü üzrə xidmətlər göstərir. 2010-cu ilin yekunları üzrə şirkətin məcmu kapitalı 4,862 milyon manat təşkil edərək 2009-cu illə müqayisədə 5,33 faiz artıb. "A-Group" ASC-nin ödənilmiş nizamnamə kapitalı il ərzində 71 faiz artaraq 2,65 milyon manat olub.
Yanvar-mayda şirkətin mükafatları 5,3 milyon manat, ödənişləri isə 2,2 milyon manat təşkil edib.
İyulun 14-nə olan rəsmi məzənnə 0,7865 AZN/USD təşkil edir.
