Azərbaycan, Bakı, 21 iyul /Trend, müxbir N.İsmayılova/
İyunun əvvəlinə olan məlumata görə, Azərbaycan banklarının ümumi aktivləri 12,97 milyard manat olub ki, bu da 2010-cu ilin mayın sonları ilə müqayisədə 7,8 faiz çoxdur. Bu barədə Azərbaycan Məkəzi Bankının məlumatında deyilir.
İnvestisiya qoyuluşları ilin əvvəlindən ötən ilin may ayına olan göstəricisi ilə müqayisədə 43 faiz artaraq 1 milyon 261,9 manat, müştərilərə verilənlər - 8 milyon 142,6 manat (0,3 faiz artım) təşkil edib. Ölkənin maliyyə sektoruna verilən kredit və depozitlərin həcmi hesabat dövründə 557,2 milyon manat, hesabat dövrü ərzində müxbir hesablarında vəsaitlər 1 milyon 121,3 manat, nağd vəsaitlər 551,8 milyon manat olub.
2011-ci il iyunun 1-nə olan vəziyyətə görə, Azərbaycan banklarının ümumi öhdəlikləri 10,723 milyard manat təşkil edərək il ərzində 7,1 faiz artıb. Bunun 5,55 milyon manatı depozitlərin, 4,29 milyon manatı maliyyə bazarından alınan kredit və depozitlərin payına düşür.
Azərbaycanda 44 bank fəaliyyət göstərir.
İyulun 21-nə rəsmi məzənnə 0,7864 AZN/USD təşkil edir.